فەرماندارێ گشتییێ ھێزێن سووریەیا دەمۆکراتیک (ھەسەدێ) بانگا پشتگریکرنا ل دەستکەفتیێن باشوورێ کوردستانێ کر و ھێڤی خواست کو ئالیێن سیاسییێن کوردی ل رۆژئاڤایێ کوردستانێ ڤەگەرن سەر مێزەیا دانووستاندنان.
فەرماندارێ گشتییێ ھەسەدێ مەزلووم عەبدی ل باژارێ حەسەکێ د چارچۆڤەیا بەشداریا د کۆربەندەکێ دەربارێ پەیمانا لۆزانێ دە دیار کر، “سیاسەتا ئینکارێ یێن لگەل پەیمانا لۆزانێ دەست پێ کرین، چ ئەنجامێن خوە پێک نەئانین و تێک چوون. ئیرۆ ل رۆژھلاتا ناڤین دەرفەت د دەستێ کوردان دە ھەیە کو راستیا دۆزا خوە و ھەبوونا خوە د نەخشەیا رۆژھلاتا ناڤین دە ئیسبات بکن.”
مەزلووم عەبدی گۆت ژی: “ل باشوورێ کوردستانێ دەستکەفتیێن کوردان ھەنە و دڤێت ئەو بێن پاراستن و پشتگریکرن.”
ھەر وھا مەزلووم عەبدی، بانگ ل ھێزێن سیاسی و لەشکەرییێن کوردستانێ کر کو بەرخوەدان و تێکۆشینێ بدۆمینن، ھێز و گۆتارا خوە بکن یەک، بێیی شەرتێن پێشین بکەڤن ناڤا تەڤگەرێ و قۆناغێ ب ئاوایەکی زەلال بنرخینن، دا کو دەرفەتان ژ دەست نەدن.
دەربارێ رەوشا رۆژئاڤایێ کوردستانێ دە مەزلووم عەبدی تەکەز کر کو ئەو د ھێزێن سووریەیا دەمۆکراتیک دە بێیی شەرت و مەرج ژ بۆ ھەر جورە دیالۆگ و یەکرێزیا ئالیێن کوردی ل رۆژئاڤایێ کوردستانێ ئامادە نە.
عەبدی وھا ئاخڤی: “مە ب رێیا دەستپێشخەریا خوە، ھەول دا کو رێزێن ھێز و ئالیێن سیاسییێن ناڤچەیێ بکن یەک و مە کاری بگھن نەخشەرێیەکە سیاسی، لێ ئەو راوەستیا و بەردەوام نەبوو. ئەم ئامادە نە کو وان گۆتووبێژان د ناڤبەرا ھەموو ئالیان دە دەست پێ بکن. ئەڤ قۆناغە، قۆناغا یەکخستنا ھەول و کەدانە و ئەم ھێڤیدارن کو ئالیێن کوردی ڤەگەرن سەر میزەیا دیالۆگێ.”
ئەنجوومەنا نشتمانییا کوردی ل سووریێ (ئەنەکەسێ) و پارتیێن یەکیتیا نشتیمانییا کوردی (پەیەنەکێ) ژ مژدارا 2019 ڤە ب پشتگریا ئامەریکا، ھەرێما کوردستانێ و ھەسەدێ دەست ب دانووستەندنێن یەکرێزیا کوردی و بەشداریا ئەنەکەسێ د ناڤا رێڤەبەریا رۆژئاڤایێ کوردستانێ دە کربوون، لێ ئەڤ دانووستاندن پشتی نێزیکی سالەکێ و بێیی گھیشتنا چ پەیمانەکێ راوەستیانە.
