پێشنیارەکا کو ئیمزەیا 80 ھەزار کەسان ل سەرە، ب مەبەستا ناساندنا جینۆسایدا کوردێن ئێزدی پێشکێشی پارلامەنتۆیا سویسرایێ تێ کرن. نھا ھەولا وێ یەکێ تێ دایین کو پشتەڤانیا ھەژمارەک فراکسیۆنێن سویسرایێ ژ بۆ ڤێ پێشنیازێ ب دەست بخن، دا کو ببە پرۆژەیاسا.
ئیرۆ شەمیێ 8 تیرمەھا 2023، سەرۆکێ دەزگەھا ناڤدەولەتی یا ئێزدیان بۆ نەھشتنا جینۆسایدان حەسۆ ھورمی ژ بۆ کوردستان24ێ راگھاند، ھەژمارەک دۆست و چالاکڤانێن ئێزدی ل سویسرەیێ ب رێیا ھەلمەتەکا ئۆنلاین کارینە 80 ھەزار ئیمزایان بەرھەڤ بکن و بشینن پارلامەنتۆیا سویسرایێ، دا کو تاوانێن داعشێ یێن ل دژی کوردێن ئێزدی وەک جینۆساید وەرن ناسین.
حەسۆ ھورمی دیار کر، ھەر چقاس 80 ھەزار ئیمزا پێشکێشی پارلامەنتۆیا سویسرەیێ ھاتن کرن، لێ ژ بۆ کو پێشنیاز ببە پرۆژەیاسا، دڤێت ھەژمارەک فراکسیۆنێن پارلامەنتۆیێ پشتەڤانیا وێ بکن.
سەرۆکێ دەزگەھا ناڤدەولەتییا ئێزدیان بۆ نەھشتنا جینۆسایدان ئەشکەرە کر کو ئەو نھا ھەول ددن پشتەڤانیا فراکسیۆنێن پارلامەنتۆیا سویسرەیێ ب دەست بخن و دبێژە، ئەگەر ئەڤ کۆمکوژی وەک جینۆساید بهێت ناسین، د سبەرۆژێ دە دێ رێگری ل دوبارەبوونا تاوانێن ب ڤی رەنگی بکە.
ئەڤە د دەمەکێ دەیە کو رۆژا 19 چلەیا 2023، پارلامەنتۆیا ئالمانیایێ ب پرانیا دەنگان کۆمکوژیا کوردێن ئێزدی وەک جینۆساید ناس کر. ب ڤێ یەکێ، بوو چارەم پارلامەنتۆیا ئەورۆپایێ کو کۆمکوژیا کوردێن ئێزدی وەک جینۆساید ناس دکن. سالا 2016 پارلامەنتۆیا فرانسایێ، پشترە ھۆلاندا و بەلچیکا تاوانێن داعشێ یێن ل دژی کوردێن ئێزدی وەک جینۆساید قەبوول کرن.
دەما ئێریشا سەر شنگالێ ژ ئالیێ داعشێ ڤە، ب ئاوایێ ھەری توند و دراندانە، کوردێن ئێزدی کەتن بەر پێلا جینۆسایدکرنێ و 6417 کوردێن ئێزدی ژ ئالیێ چەکدارێن داعشێ ڤە ھاتن رەڤاندن، کو ھەتا نھا ب ھەڤکاریا حکوومەتا ھەرێما کوردستانێ کارینە 3562 کەس بهێن رزگارکرن و ئەوێن دن ھەتا نھا ژی وندا نە.
ھەروھا بەشەک ژ وان د گۆرێن کۆمی دە ھاتنە کۆمکوژی و جینۆسایدکرن، کو ھەتا نھا 83 گۆرێن ب کۆم ھاتنە دیتن و لگەل وێ ژی، داعشێ 68 گۆرستان و پەرەستگەھێن کوردێن ئێزدی ژ ناڤ برنە و وێران کرنە.
د کۆمکوژیا شنگالێ دە 2 ھەزار و 745 زارۆک بێ دایک و باب مانە، لگەل وێ ژی نێزیکی 400 ھەزار کوردێن ئێزدی ئاوارە بوونە و ھەتا نھا ژی پرانیا وان ڤەنەگەریانە جھ و وارێ خوە و د چادرێن کامپان دە ژیانەکە دژوار دژین.
