ھەسەدە رەد دکە کو شەرڤانێن وێ بەشداری شەرێ ل ئوکراینایێ بووبن

ھێزێن سووریەیا دەمۆکراتیک (ھەسەدە) رەد دکە کو شەرڤانێن وێ د شەرێ ئوکراینایێ دە بەشدار بووبن، پشتی راپۆرتەکا ئاژانسەکا رووسی کو ئەو ھێز ب شاندنا ب سەدان شەرڤانێن ھەسەدێ بۆ ئوکراینایێ تاوانبار کر.

ناڤەندا راگھاندنێ یا ھەسەدێ دوھی 8ێ تیرمەھا 2023 د داخویانیەکێ دە راگھاند: “ھندەک دەزگەھێن راگھاندنێ نووچەیێن چێکری و سەختە دەربارێ بەشداربوونا شەرڤانێن مە د شەرێ ل ئوکراینایێ دە بەلاڤ کرن. ئەم پشتراست دکن کو ئەڤ نووچە دەرەون و ت بنگەھێ وێ د راستیێ دە نینە و ژ ئالیێ لایەنێن کو ب ژێدەرێن خوە یێن ئەرزان تێن ناسکرن ڤە تێن وەشاندن.

ھەسەدێ تەکەز کر: “ئەڤ تەڤگەرێن کو تێن ئیدیعاکرن نە ل گۆری پیڤانێن نیشتیمانی یێن ھێزێن سووریەیا دەمۆکراتیک یێن تێکۆشینا د ناڤا خاکا سووریێ ژ بۆ پاراستنا ھەرێمێ و گەلێ وێ دە نە و ھێزێن مە ب مژارێن دن یێن دەرڤەیی سووریێ رە تێکلدار نابن.”

ئەڤ داخویانیا ھەسەدێ پشتی وێ تێ، ئاژانسا رووسی “سپوتینک” رۆژا ئینێ راپۆرەک بەلاڤ کر و ل سەر زارێ ھندەک چاڤکانیان گۆت کو “ئارتێشا ئامەریکایێ 650 چەکدارێن ھەسەدێ شاندنە ئوکراینایێ.”