31 سال ل سەر تەرۆرکرنا جومعا عەبدولغەنی ل سەر دەستێ پەکەکێ ل باژارێ دێرکێ یێ رۆژئاڤایێ کوردستانێ دەرباس دبن.

د ڤێ دەربارێ دە، ژێدەرەکێ ژ مالا عەبدولغەنی ھوورگولیێن تەرۆرکرنا وی ئەشکەرە کرن و گۆت: ب شێوەیەکی ھۆڤانە ھاتە تەرۆرکرن، و ھندەک ژ کوژەران نھا ل دەڤەرێ بوونە بەرپرس د رێڤەبەریا پەیەدێ دە.

ھەروھا نڤیسکار وەلید حاج عەبدولقادر ژی راگھاند، کو ھەژمارەک چەکدارێن پەکەکێ یێن نێزیک ژ شەھید جومعا عەبدولغەنی، پشتی دانینا پلانا تەرۆرکرنێ، ئەو ل پێشیا مالا وی و ل پێش چاڤێن زارۆکا وی (رۆناھی)، تەرۆرکرن، و تەکەز کر، ھەژمارا چەکداران دەردۆرا 10 کەسان بوو، و ل جەم خەلکێ دەڤەرێ ژی ناسکرینە و دکارن ھەر کەسەکی کو رێگریێ ل وان دکە، بکوژن.

نڤیسکارێ کورد دیار کر، ژ بەریا کو جومعا شەھید ببە، دزانی کو پەکەکێ پلانا تەرۆرکرنا وی دانیە، لێ ژ دێرکێ نەدەرکەت.

د دەربارێ سەدەمێن تەرۆرکرنا جومعا دە، عەبدولقادر تەکەز کر، کو جومعا عەبدولغەنی ژ پەکەکێ جودا بوو و رەخنە ل کریارێن پەکەکێ دگرتن و ژ بەر ڤێ چەندێ ھاتە تەرۆرکرن، تەکەز کر ژی، دۆسەیا شەھید جومعا عەبدولغەنی، دۆزەکا سیاسییە نە جڤاکییە.

جومعا عەبدولغەنی کییە؟

شەھید جومعا د سالا 1959ێ دە ل باژارێ دێرکێ د مالباتەکا کو ب کارووبارێن گشتی ڤە مژوول دبوو و نێزیکی خەباتێن سیاسی بوو ژ داییک بوو.

ھەیا قۆناغا ئامادەکاریێ ل دبستانێن دێرکێ خوەندیە، پاشێ ئەو ژ بۆ لەشکەریێ ھات برن و ل شامێ خزمەت کر و ل ور ژ وەختێ خوەیێ ڤالا سوود وەردگرت و دەرباسی کۆرسێن پەروەردەیا کاراتێ بوو و بلندترین خەلات ب دەست خست.

پشتی کو ژ لەشکەریێ دەرکەتی، دەمەکێ ل شامێ ما و کارێ ئاڤاھیسازیێ کر، پشتی دەمەکێ ڤەگەریا باژارێ خوە و ب کەچا خالەتا خوە رە زەوجی. د ڤێ ھەیامێ دە تەڤگەرا پەکەکێ ل ھەرێمێ دەست پێ کربوو و پشتی دەمەکێ کورت تەڤلی رەفێن پەکەکێ بوو و بوو یەک ژ کادرۆیێن ناڤدارێن پەکەکێ ل وێ ھەرێمێ و ژ بەر ڤێ یەکێ ژی رێخستنێ گەلەک باوەری ب وی ئانی و ئەرکێن گرینگ ب وی دان، خەبات و تێکۆشینا خوە د ناڤا پەەکەکێ دە ھەتا دەستپێکا سالا 1992 بەردەوام کر، هەیا کو ناکۆکی د نێڤبەرا وی و پەکەکێ دە خویا بوون، پەکەکێ وەکە کارێ خوە یێ هەرتم ل شوونا کو ب روحەکا دەمۆکراتیک پێ رە مژوول ببە بریارا تاسفیەکرنا جومعا دا.

جومعا عەبدولغەنێ چەوا هات تەرۆرکرن؟

جومعا عەبدولغەنێ د شەڤا 12/7/1992 دە ب شیوازەکی مافیاگەری ھاتە ئارمانجکرن، ئەو ل بەر دەریێ مالا خوە راستی ئێریشێ ھات، د دەمەکی دە کو کەچا خوە رۆناھی د دەستێن خوە دە هلگرتبوو هات دۆرپێچ کرن، وی خوەست ب لاشێ خوە کەچا خوە یا بچووک بپارێزە.

شەهید جومعا خوەدی دو زارۆک بوو، هەڤژینا وی ل دەما تەرۆرکرنا وی دە دوجانی بوو، دیمەنێ ئارمانجگرتنا شەهید جومعا د دەمەکی دە کو زارۆکا خوە هەمبێز کربوو هەیا کو وێ بپارێزە هەتا نها بوویە مژارا ئاخافتنا خەلکێ دێرکێ، هەر وەها دەنگێ فیشەکێن کوژەران کو د مالا جومعا دە خوارن و ڤەخوارن خوارنە د مەژیکێ گەلێ دێرکێ دە دەنگ ڤەددە و مافیاگەریا پەکەکێ ل بیرا وان تینە.