ل دێرسیمێ دەما کو ئەندامێن کۆمەلەیا مافێن مرۆڤان خوەستن چالاکیەکێ ل دار بخن راستی ئاستەنگیا هێزێن ئەولەکاریێ هاتن و د ئەنجامێ دە ئەندام هەم راستی توندیێ هاتن و هەم ژی ژ ئالیێن هێزێن ئەولەکاریێ ڤە هاتن بنچاڤکرن.
ئەندامێن کۆمەلەیا مافێن مرۆڤان ل دێرسمێ ژ بۆ کو بریارا دادگەها ماکەزاگۆنێ یا دەربارێ خزمێن سەروندایان دە وەرە جیبجیکرن خوەستن هەتا قادا سەید رزا بمەشن و ل ڤێ دەرێ داخویانیەکێ بدن.
لێ هێزێن ئەولەکاریێ ب سەدەما کو ژ بۆ چالاکیێ دەستوور نەهاتیە خوەستن گرسەیا کو دخوەست بمەشە دۆرپێچ کر و پاشێ بەشدارێن چالاکیێ هاتن گرتن.
د ئەنجامێ دە هەڤسەرۆکێن کۆمەلەیا مافێن مرۆڤانا شاخا دێرسمێ گۆنول سۆنباهار و گوربوز سۆلماز هاتن بنچاڤکرن و هەر وها کوبا ئۆکتای و حوسەیین یاشار ژی هاتن بنچاڤکرن.
بەشدارێن چالاکیێ ئاماژە کرن کو خوەنیشاندان و داخویانی مافەکی دەستوورییە و نابە رێ ل بەر وەرە گرتن و ئارمانجا چالاکیێ ژی ئەوە کو قەدەخەکرنا چالاکیا داییکێن شەمیێ یا ستەنبۆلێ پرۆتەستۆ بکن و ئەو قەدەخە وەرە راکرن.
هات راگهاندن کو دەما بنچاڤکرنێ دە رۆژنامەگەر هدر یلدز ژی راستی توندیێ هاتیە و هێزێن ئەولەکاریێ رێ نەدانە کو دیمەنان بگرە.
هەر وها پارێزگەریا دێرسمێ ژی بۆ 1 رۆژی قەدەخەیا چالاکیان راگهاند.
