8 سال د سەر شکەستنا پێڤاژۆیا چارەسەریێ رە دەرباس دبن
هەشت سال د سەر شکەستنا پێڤاژۆیا چارەسەریێ یا د ناڤبەرا پارتیا كاركه‌ران و دەولەتا ترکیێ رە دەرباس دبن.
پێڤاژۆیا چارەسەریێ ژ سالا 2013 هەتا 2015ان د ناڤبەرا په‌كه‌كێ و حکوومەتا ترکیێ دە ب رێ ڤە چووبوو. د 22ێ ترمەهێ یا سالا 2015ێ دە ل باژارۆکێ سەرێکانیێ یێ رهایێ دو پۆلیس ل مالا خوە دەما د خەو دە بوون هاتبوون کوشتن و ئەڤ بوویەر وەکی دەستپێکا شکەستنا پێڤاژۆیا چارەسەریێ تێ زانین.
په‌كه‌كێ ل سەر ڤێ بوویەرێ داخویانیێن ناکۆک دابوون.
باسکێ لەشکەرییێ په‌كه‌كێ، هێزێن پاراستنا گەل (هه‌په‌گێ) د داخویانیەکێ خوە دە گۆتبوو، هەر دو پۆلیس ژ ئالیێ تیما فەدایی یا ئاپۆیی ڤە هاتنە کوشتن. لێ هەڤسەرۆکێ كه‌جه‌كێ جەمیل بایکی پێوەندییا په‌كه‌كێ ب ڤێ بوویەرێ رە، پشتی چار مەهان رەد کر.
دەولەتا ترکیێ ب هنجەتا ڤێ بوویەرێ، د 24ێ تیرمەهێ دە ب دەهان فرۆکەیان ژ گارێ و زاپێ هەتا قەندیل و ئاسۆسێ بنگەهێن په‌كه‌كێ بۆمبەباران کرن. ئەڤ ژی پشتی سێ سالان، یەکەمین ئۆپەراسیۆنا کو ل دژی په‌كه‌كێ بوو.
ئەڤ ئۆپەراسیۆن پشترە بەرفرەهـ بوو و ل سەر سینۆرێ باشوورێ کوردستانێ 11، ل سەر سینۆرێ رۆژئاڤایێ کوردستانێ ژی سێ ئۆپەراسیۆنێن مەزن هاتن کرن. شەرێ خەندەکان یێ ل باژار و باژارۆکێن باکورێ کوردستانێ و وێرانبوونا ب هەزاران ئاڤاهیان و کۆچا نێزکێ ملیۆنەکێ وەلاتیان ژی ئەنجامێن دن یێن دژوارێن شکەستنا پێڤاژۆیا ئاشتیێ بوون.
ل گۆر ئامارێن کۆما کریزا ناڤنەتەوی، ژ شکەستنا پێڤاژۆیا ئاشتیێ هەتا نها:
– 614 سڤیل.
– 1428 ئەندامێن هێزێن ئەولەکاریێ یێن ترکیێ.
– 4409 گەریلایێن په‌كه‌كێ.
– 226 کەسێن ناسنامەیان وان نەهاتنە زەلالکرن و گومان تێ کرن کو ئالیگرێن په‌كه‌كێ یێن شەرێ خەندەکان بن، جانێ خوە ژدەست دان.
پشتی شکەستنا پێڤاژۆیا چارەسەریێ یەکەم بانگا ڤەگەرا پێڤاژۆیێ د ئاستا هەری بلند دە، ژ هه‌ڤسه‌رۆكێ كه‌جه‌كێ جەمیل بایکی هاتبوو.
باییک د 9ێ سباتێ دە ب هنجەتا ئەردهەژێن ل باکورێ کوردستانێ چالاکیێن چەکداری یێن په‌كه‌كێ راوەستاندبوون. د 1ێ ئادارێ دە ژی بانگا دەستپێکرنا پێڤاژۆیا چارەسەریێ کربوو و ژ ئه‌مەریکایێ خوەستبوو د ناڤبەرا وان و ترکیێ دە رۆل بگەرینە.
لێ ئەڤ بانگا باییک نە ژ ئالیێ واشنگتۆنێ، نە ژی ژ ئالیێ ئەنقەرێ ڤە بەرسڤا وێ هاتبوو، پشترە ژی كه‌جه‌كێ مەها بۆری ئاگربەستا خوە بداوی کر.
