ل باژارۆکێ جندرێسێ یێ سەر ب عەفرینێ ڤە، گرووپەکێ چەکدار ب ئاوایەکی هۆڤانە ل جوانەکی ژ مالباتا شەهیدێن نەورۆزێ دان، ب ئۆتۆمۆبیلێ د سەر دەستێ وی رە چوون و دەستێ وی شکاندن.
رێخستنا مافێن مرۆڤان ل عەفرینێ بەلاڤ کر، دوهی 23ێ تیرمەهێ ل باژارۆکێ جندرێسێ، گرووپەکێ چەکدار ژ جەیش ئەل-شەرقیە ب سەر دکانەکێ دا گرتن و ب ئاوایەکی هۆڤانە ل گه‌نجێ 19 سالی «نەزمی ئەشرەف ئۆسمان» دان، بلۆكا قەرمیدی ل پشتێ دان و ب ئۆتۆمبیلا لەشکەری د سەر دەستێ وی رە دەرباس بوون.
دا زانین ژی، د ئەنجاما لێدانێ دا، نەزمی ئەشرەف ئۆسمان ب گرانی بریندار بوو و هەر دو دەستێن وی شکەستن کو ژ بۆ نەخوەشخانەیا گوندێ ئەتمێ یێن سەر ب ئدلبێ ڤە هات ڤەگوهاستن.
رێخستنا مافێن مرۆڤان د راپۆرتا خوە دا دا زانین ژی، ئەڤ گرووپا چەکدار برا و مرۆڤێن کوژەرێن 4 شەهیدێن شەڤا نەورۆزێ نە و دەما ل نەزمی ئەشرەف ئۆسمان ددان کو برازایێ شەهیدانە، سلۆگانێن نه‌ژادپەرەستیێ د گۆتن و ژ وی را دگۆتن: «هوونێ جه‌زایێ گرتنا برا و مرۆڤێن مە بده‌ن».
ل باژارۆکێ جندرێسێ د ئێڤارا نەورۆزا 2023ێ دا، چەکدارێن گرووپا جەیش ئەل-شەرقیە ئێریشی سەر مالباتا پێشمەرگێن کورد کرن و ژ بەر کو وان ئاگرێ نەورۆزێ هه‌لكربوون گوللـە رەشاندن و (3 برا و برازایەکی وان) شەهید کرن، کو نها چەند ئێریشکەر ژ وێ گرووپێ هاتینه گرتن.
پشتی ڤێ تاوانا هۆڤانە ژی، کارڤەدانێن توند، نەرازیبوون و خوەپێشاندانێن بەرفرەهـ ل سەر ئاستا ناڤخوە و دەرڤە دەرکەتن، تێدا خوەپێشاندەران ئەڤ کۆمکوژی شەرمەزار کرن، داخوازا دادگەهکرنا تاوانباران ل دادگەهەکا ناڤدەولەتی کرن، هەروه‌ها داخوازا دەرکەتنا چەکداران ژ ناڤا گوندی و باژاران کرن و رێڤەبەرییا هەرێما عەفرینێ بۆ خەلکێ هەرێمێ یێ رەسەن بهێته رادەستکرن.
