وەزارەتا بەرەڤانیا ترکیێ راگهاند، ل هەرێما کوردستانێ د ئێریشا چه‌كدارێن پارتیا كاركه‌ران دە لەشکەرەکی وان هاتیە کوشتن.
ل گۆری داخویانیا وەزارەتا بەرەڤانیێ یا ترکیێ، د ئۆپەراسیۆنا “پەنجە-کلیت” دە کو ل هەرێمێن مەتینا، زاپ و ئاڤاشین-باسیان یێن ل سینۆرێ ناڤچەیا ئامێدیێ یا دهۆکێ پێک تێ، لەشکەرەکی وان هات کوشتن.
د داخویانیێ دە هات دەستنیشانکرن، کو د ئەنجاما ئێریشا چه‌كدارێن پارتیا كاركه‌ران دە لەشکەرێ ب ناڤێ مه‌همه‌ت جان جانێ خوە ژ دەست دا. لێ پارتیا كاركه‌را هەتا نها دەربارێ بوویەرێ دە ت داخویانی نەدایە.
ئارتێشا ترکیێ رۆژا 17ێ نیسانا 2022ان د ناڤ ئاخا باشوورێ کوردستانێ دە ل دژی پارتیا كاركه‌ران دەست ب ئۆپەراسیۆنا ب ناڤێ «پەنجە-کلیت» کر و ئۆپەراسیۆن هەتا نها بەردەوامە. ئۆپەراسیۆنا «پەنجە-کلیت» ناڤچەیێن مەتینا، زاپ و ئاڤاشین-باسیانێ یێن ل سینۆرێ ناڤچەیا ئامێدیێ ل خوە دگرە.
