چەکدارێن ئۆپۆزیسیۆنا سووریێ یێن لگەل ترکیێ عەفرین داگیر کرین، باجا ھەزار دۆلاران ل سەر ھەر کەسێ کو دخوازە خانیێ خوەیێ داگیرکری ڤەگەرینە، فەرز دکە.
رێخستنا مافێن مرۆڤان ل عەفرینێ د راپۆرەکێ دە بەلاڤ کر، گرووپا سولتان سلمان شاھ (ئەمشات) باجا ھەزار دۆلاران ل 4 وەلاتیان و باجا 500 دۆلاران ل 3 وەلاتیێن گوندێ میرکایێ ل ناڤچەیا مابەتا فەرز کرن کو بەری دەمەکێ ژ حەلەبێ ڤەگەریابوون و مالێن خوەیێن داگیرکری ڤەگەراندبوون.
رێخستنا مافێن مرۆڤان گۆت ژی، ھەمان گرووپا ئەمشات باجا 40 ھەزار دۆلاری ل 72 وەلاتیێن گوندێ کاخرێ یێ مابەتا فەرز کرن، ئەو ژی ب بھانەیا کو وان سماقا خوە بێ وەرگرتنا مۆلەتێ چنینە.
ژ ئەنجاما ئێریشا ئارتێشا ترکیێ و گرووپێن چەکدار ل سەر ھەرێما عەفرینێ د چلەیا 2018 دە، زێدەتر ژ 300 ھەزار کوردێن عەفرینێ کۆچبەر بوون، چەکداران ژی دەست دانین سەر پرانیا خانی، مال و ملکێن کۆچبەران و مالباتێن خوە و عەرەبێن ژ ناڤچەیێن دن تێ دە بجھ کرن. ھەر کەسێ کو بخوازە ڤەگەرە عەفرینێ و خانیێ خوە وەربگرە، باجەکا مەزن ل سەر تێ فەرزکرن.
