ل باژارێ قامشلۆیێ رۆژئاڤایێ کوردستانێ، ھەڤدەم لگەل بلندبوونا نرخێ سۆتەمەنیێ، کرێیا چوونووھاتنا ب ئۆتۆمۆبیلان زێدە بوو، وەلاتی ژی گازنان ژ زێدەبوونا نرخێ چوونووھاتنا ئۆتۆمۆبیلان دکن.
رێڤەبەریا خوەسەر رۆژا 16 تیرمەھێ نرخێ بەنزینێ ژ سەدی 100 زێدە کربوو، پێ رە ژی نرخێ ھەر تشتی زێدە بوو. لگەل بلندبوونا نرخێ دۆلار و داکەتنا لیرەیا سووری ژی، رەوشا وەلاتیێن رۆژئاڤایێ کوردستانێ زەھحەتر دبە.
د نووترین پێشھات دە ژی کرێیا چوونوو ھاتنا د ناڤبەرا باژارێن رۆژئاڤا دە و کرێیا تاکسیێن ناڤ باژاری ژی بلند بوو.
ئاژۆکار محەمەد عۆمەر دبێژە: “پێشتر مە کرێیا د ناڤا باژار دە 1000 لیرە دستاند، لێ نھا مە کریە 1500. بەنزین بھا بوو و نرخێ دۆلار ژی بلند بوو. مە نەدخواست کو کرێیێ زێدە بکن، لێ مە ژ نەچاری کر.
ل تەڤاھیا ناڤچەیێن رۆژئاڤایێ کوردستانێ و پرانیا ناڤچەیێن سووریێ نرخێ یەک دۆلاری گھشتیە 13 ھەزار لیرەیان. وەلاتیێن رۆژئاڤا ژی گازندان دکن کو کۆنترۆلا ڤێ رەوشێ نایێ کرن کو زەرەمەندێ یەکەمیێ بلندبوونا دۆلاری وەلاتی نە.
وەلاتی زوبێر دەلی دبێژە: “پرسا زێدەبوونا نرخێ کرێیا ئۆتۆمۆبیلان، ژ خەلکێ پر زەحمەتە. دەما ئەم دچن بازاران و پێویستیێن مالێ دابین دکن، ئەم گەلەک پەرە ددن کرێیا ئۆتۆمۆبیلان.”
رێڤەبەریا خوەسەر نرخێ بەنزینێ ژ سەدی سەد زێدە کریە کو بەری نھا لترا بەنزینێ ب 225 لیرەیان بوو، لێ نھا ب 425 ھاتیە دەستنیشانکرن. ژ دەستپێکا ئیسالە ڤە ژی، ئەڤە جارا چارەمینە کو رێڤەبەریا خوەسەر نرخێ سۆتەمەنیێ بلند دکە.
