ل دادگەھا مێردینێ یا ل باکورێ کوردستانێ، سبە پێنجشەمبێ 27 تیرمەھا 2023، یەکەم روونشتنا دادگەهکرنا کوژەرێن بوویەرا نسێبینێ برێڤە دچە.
نوونەرێ مالباتێن قوربانیان حەربی جەلالەدین راگھاند، روونشتنا دادگەھێ دێ د دەمژمێر 9:30 خولەکان دە ل دادگەھا مێردینێ ب ئامادەبوونا کوژەران کو پێنج تاوانبارن، برێڤە بچە، کو دەربارێ دۆزێ دە ئەڤ یەکەم روونشتنا دادگەھێیە.
حەربی جەلالەدین دیار کر، ئەو وەک مالباتا قوربانیان لگەل پارێزەرێن خوە دێ د روونشتنێ دە ئامادە بن و داخواز دکن کو دادگەھ د سزادانا تاوانباران دە رۆلا خوە ببینە و راستیا ل پشت ڤێ بوویەرێ ژ مالباتا قوربانیان و رایا گشتی رە ئەشکەرە بکە.
سبەھا رۆژا پێنجشەمێ 19 چلەیا 2023 ل ناڤچەیا نسێبینێ یا سەر ب پارێزگەھا مێردینێ یا باکورێ کوردستانێ، پێنج وەلاتیێن خەلکێ باژارێ دوھۆکێ د ئۆتۆمۆبیلا خوە دە ژ ئالیێ چەند کەسان ڤە ھاتن شەھیدکرن. د دەمەکێ دە کو ئەو وەلاتیێن باشوورێ کوردستانێ ب مەبەستا وەرگرتنا تەداویا نەخوەشیێ چووبوون باکورێ کوردستانێ.
بوویەر ل سەر رێیا سەرەکی یا نسێبین-مێردینێ یا ل باکورێ کوردستانێ روودابوو. پشتی بوویەرێ ھێزێن ئەولەھیێ یێن ترکیێ پێنج کەس دەربارێ بوویەرێ دە دەستەسەر کرن کو دو ژ وان تاوانبارێن سەرەکی نە و سێ کەسێن دن ژی ئالیکارن.
