عەمید محەمەد یونس سۆفی 23 تیرمەھێ دەمژمێر 20:00 دەما ل جادەیا ھەری قەلەبالغا زاخۆیێ وەساییتا خوە د ئاژۆت، د ئەنجاما تەقینێ دە ئاگر ب وەساییتا وی کەت و ژیانا خوە ژ دەست دا.
ئاژانسا ئاساییشا ھەرێما کوردستانێ راگھاند، ئەشکەرە بوویە کو ئێریشا ل زاخۆ تێ دە عەمید محەمەد میرزا یونوس سۆفی هاتیە شەهیدکرن، ژ ئالیێ پەکەکێ ڤە ھاتیە ئەنجامدایین.
د داخویانیا ئاساییشا ھەرێما کوردستانێ دە ھات گۆتن کو محەمەد میرزا د ئەنجاما تەقینا بۆمبەیەکی کو بەرێ پەکەکێ د ناڤ ئۆتۆمۆبیلا وی دە چاندبوو ژیانا خوە ژ دەست دایە و د بەلگە و ڤیدیۆیێن کو د ئەنجاما لێکۆلینێ دە ھاتنە بدەستخستن دە ھاتیە گۆتن کو بۆمبە ژ ئالیێ کۆمەکا پەکەکەیی ڤە د ترومبێلا وی دە ھاتبوو بجھکرن.
د داخویانیێ دە ئەڤ ئاگاھی ھاتن دایین:
“سبەھا رۆژا 23 تیرمەھا 2023، ب رێیا ئۆتۆمۆبیلەکێ ژ جوورەیا ھیوندا توکسۆن کو رەنگێ وێ سپی بوو ب پلاکایا ھەژمارا سەختە، ژ بۆ خوەڤەشارتنا ژ کامەرایێن چاڤدێریێ و رێبەندان، پەکەکەیی ژ جادەیەکا لاوەکی چوونە ناڤ باژارێ زاخۆیێ و چاڤدێریا مال و ئۆتۆمۆبیلا عەمید محەمەد میرزا کرنە.
د دەمژمێر 04:00 بەربانگێ دە بۆمبەیەکە کو ب ئۆتۆمۆبیلا عەمید محەمەد میرزا ڤە ل بەر مالا وی ھاتیە گرێدان، د دەمژمێر 19:49ێ ئێڤارێ دە رۆژا 23 ڤێ مەھێ ل سەر جادەیا گشتییا باژارێ زاخۆیێ ب رێیا ریمۆت کۆنترۆلێ، ئۆتۆمۆبیل ھاتیە تەقاندن.
د بەشەکە دنا داخویانیا ئەنجوومەنا ئاسایشا ھەرێما کوردستانێ دە بەھسا وێ یەکێ ھاتیە کرن، پێشتر ب رێیا سازیێن سەر ب ئەنجوومەنێ ڤە زانیاریێن وان ھەبوویە کو سەرکردەتیا پەکەکێ پیلانا ئارمانجکرنا ھەژمارەک ژ ئەفسەرێن ئەنجوومەنا ئاسایشا ھەرێما کوردستانێ دارشتنە و ژ بۆ ڤێ مەبەستێ ژی راھێنان ب چەند کەسان ل سەر چێکرن و دانین و گرێدانا بۆمبەیێ کرنە و ھەولا دەرباسکرنا وان بۆ ناڤ ھەرێما کوردستانێ دانە.”
ژ ئالیەکی دن ڤە ئەنجوومەنا ئاسایشا ھەرێما کوردستانێ تەڤی شەرمەزارکرنا ڤێ کریارا تەرۆریستی، تەکەزی ل سەر وێ یەکێ دکە کو کەسێن ئەڤ کارە ئەنجام دایین، ل کو دبن بلا ببن، دێ باجا ڤی کارێ خوەیێ تەرۆریستی بدن و بگھن سزایێ خوەیێ یاسایی.
