بەرپرسێ باسکێ سنونێ یێ بنکەیا لالەشێ راگەھاند، گرۆپێن نەرەوا ل شنگالێ ب سەدان زارۆک کرنە چەکدار، کو هێژ تەمەنێ وان نەگەھەشتیە 18 سالان و وی کارێ خوە ژی بەردەوام دکن. ھەر دەمەکی کو دەرفەت ژ بۆ وان گرۆپێن نەرەوا چێبە زارۆکان دبن و دکن چەکدار.
بەرپرسێ باسکێ سنوونێ یێ بنکەیا لالەش در. سلێمان فانۆ راگەھاند: ‘”رەوشا خەلکێ شنگالێ رۆژ ب رۆژ خرابتر دبە و چ گوھەرتنەک ژ بۆ رەوشا شنگالێ تنە، کو نھا دەرفەتا کارکرنێ ژی ل شنگالێ نینە و گرۆپێن نەرەوا ھەر دەما کو دەرفەتا وان ھەبە زارۆکان دبن و دکن چەکدار. دەرڤەیی وێ ژی ئەو زارۆکێن کو داعشێ رەڤاندبوون و پەروەردە و راھێنان کربوون، ژ سالا 2014ێ ڤە ئەڤ بوو 9 سال و هێژ ژی ئەو زارۆکانە نەھاتنە رزگار کرن. وێ دەمێ زارۆک بوون، لێ نھا مەزن بوونە و ل سەر ھزرا تەرۆریستی ھاتنە پەروەردە کرن و مەترسی ھەیە کو دژی گەلێ خوە چەک راکن. ژ بەر کو ئەو د ناڤ مالبات و کەسووکارێن داعشێ دە مانە”.
ھەروھا ئاشکەرا کر: “ھەتا نھا شنگال داگیرکری یە و ھەر جارێ ب ئاوایەکی تێ داگیرکرن. حکوومەتا ئیراقێ ژ سووریێ ڤە مالباتێن داعشێ تینە ئیراقێ و ھەموو ھەوکاریەکی ژی ژ بۆ وان پێشکەش دکە. لێ پشتی 9 سالان قوربانیێن جینۆسایدا شنگالێ کو کۆچبەرن، نکارن ڤەگەرن سەر مال و حالێن خوە”.
