پشتی چەکدارێن پەکەکێ زارۆکەک ژ باژارێ کۆبانێ یێ رۆژئاڤایێ کوردستانێ رەڤاندی، داییکا وێ زارۆکێ ئەڤە 3 رۆژە ژ بۆ چارەنڤیسا زارۆکا خوە ل جادەیێن کۆبانێ دگەرە و داخواز دکە پەکەکە زارۆکا وێ ڤەگەرینە.
گرتە ڤیدیۆیا داییکەکا کورد یا ل رۆژئاڤایێ کوردستانێ بەلاڤ بوو، کو دیار دبە ئەڤ 3 رۆژە ئەو داییکە ل دژی رەڤاندنا زارۆکا خوە یا ژ ئالیێ رێخستنا ب ناڤێ جوانێن شۆرەشگەر یا سەر ب پەکەکێ ڤە، وێنەیەکی زارۆکا خوە یا رەڤاندی گرتیە و ل شەقامێن باژار دگەرە و داخوازا ڤەگەراندنا زارۆکا خوە دکە.
د ڤێ دەربارێ دە ئەندامێ کۆمیتەیا سیاسی یا پارتیا یەکتیا کوردستان – سووریە عەدنان بۆزان بانگەوازی ل رێخستنێن مافێ مرۆڤ و ھێزێن ھەڤپەیمانیا ناڤنەتەوی و ھەموو ئالیێن پەیوەندیدار کر کو دەستوەردانێ بکن و فشارێ بخن سەر ھێزێن سووریا دەمۆکراتیک (ھەسەدێ) کو ئەو زارۆک ژ بۆی مالباتا وێ بهێت ڤەگەراندن.
عەدنان بۆزان راگەھاند، ئەو زارۆکا ھاتیە رەڤاندن، کەچا مالباتەکا خوەدی شەھیدە و دیمەنێن گەرا داییکا وێ یا د ناڤ شەقامێن کۆبانێ دە ژی دلھەژینە.
ھەروھا گۆت، ھێزێن پەیەدێ و باسکێن دن یێن پەکەکێ رەڤاندنا زارۆکان بەردەوام دکن، لێ جڤاکا کوردی و ھێزێن سیاسی و رێخستنێن سڤیل بەردەوام نەرازیبوونێ ل دژی وێ نیشان ددن.
