کۆنسولا بریتانیا داخواز ژ هەر دو حكوومه‌تێن ئیراق و هەرێما کوردستانێ کر کو رێکەفتنا شنگالێ جیبجی بکن و ئاڤەدانکرنا وی باژاری و ڤەگەراندنا ئەولەهیێ ژی پێویست دبینە.
د بن چاڤدێریا سەرۆکێ هەرێما کوردستانێ نێچیرڤان بارزانی ئیرۆ 3ێ تەباخێ کۆنفەرانسا سالڤەگەرا ژەنۆسیدا ئێزدیان ب دروشما (بەر ب داهاتوویەکە بەردەواما ئارام ژ ئێزدیان رە) ل هەولێرێ لدار کەت.
کۆنسولا گشتی یا بریتانیا ل هەرێما کوردستانێ رۆسی جاڤە، د کۆنفەرانسێ دە گۆتارەک پێشکێش کر و تێ دە گۆت: «بریتانیا دێ بەردەوام بە ل سەر تێکشکاندنا رێخستنا تەرۆریستا دائشێ و دێ ب هێزێن هەڤپەیمان، حكوومه‌تا هەرێما کوردستانێ و ئالیێن پەیوەندیدار رە د پەیوەندیێ دە بە، دا کو ب یەکجاری داوی ل داعشێ بێ و لێکۆلینێ ل سەر تاوانێن وێ رێخستنا تەرۆریستی بێ کرن.
کۆنسولا گشتی یا بریتانیا ل هەرێما کوردستانێ داخواز ب پێویستی زانی کو رێکەفتنا شنگالێ یا د ناڤبەرا حكوومه‌تا ئیراقێ و هەرێما کوردستانێ دە بێ جیبجیکرن، کۆچبەرێن ئێزدی ڤەگەرن مالێن خوە، ئەولەکاریا وان بێ گارانتیکرن و شنگال ژ نوو ڤە بێ ئاڤەدانکرن.
ل گۆری کۆنسولا بریتانیا، هەتا نها نێزیکی 8 هەزار ئێزدی ژ دەستێ چەکدارێن داعشێ هاتنە رزگارکرن و ئەو لگەل هەردو حكوومه‌تا ئیراقێ و هەرێما کوردستانێ ئالیکاریا ئێزدیان دکن.
رۆسی جاڤە گۆت: «رێخستنێن ناڤدەولەتی ئالیکارییێن باش پێشکێشی کوردێن ئێزدی کرنە، ب تایبەتی د وارێ دارایی دە. لێ دڤێ ئەڤ ئالیکاری بدۆمن و ئەم وەک حكوومه‌تا بریتانیایێ چ ژ دەستێ مە بێ ژ بۆ ئالیکاریا ئێزدیان، ئەمێ بکن.
پارلامەنتۆیا هەرێما کوردستانێ رۆژا 3ێ تەباخێ وەکە رۆژا ژەنۆسیدا کوردێن ئێزدی راگهاندیە و ئیرۆ 9 سال د سەر ژەنۆسیدا کوردێن ئێزدی رە دەرباس دبن.
ژ بەر ئێریشا داعشێ یا ل سەر شنگالێ د 3ێ تەباخا 2014ان؛ زێدەتری 5 هەزار کوردێن ئێزدی هاتنە کوشتن و نێزیکی 2745 زارۆک ژی بێ دی و باڤ مانە. هەروها ژ بەر ئێریشان زێدەتری 325 هەزار ئێزیدی کۆچبەر بوونە.
ل گۆر ئامارێن داوییێن ئۆفیسا رزگارکرنا رەڤاندیێن ئێزیدی یا حكوومه‌تا هەرێما کوردستانێ، 135 هەزار و 860 کوردێن ئێزیدی کۆچبەری هەرێما کوردستانێ بوونە، 189 هەزار و 337 کەس ژی کۆچبەری ناڤچەیێن جودائێن باشوورێ کوردستانێیێن دەرڤەیی ئیدارەیا هەرێما کوردستانێ بوونە.
ل گۆر ئامارێن داوییێن کو ئۆفیسا رزگارکرنا رەڤاندیێن ئێزیدی کو د مەها هەزیرانێ دە بەلاڤ کریە، 6 هەزار و 417 کوردێن ئێزیدی ژ ئالیێ تەرۆریستێن دائشێ ڤە هاتنە رەڤاندن، کو هەتا نها 3 هەزار و 458 کەس ژ وان هاتنە رزگارکرن و 2 هەزار و 693 کەسێن دن ژی وندانە و چارەنڤیسا وان نەدیارە.
پشتی ئێرشێن دائشێ هەتا نها زێدەتری 85 گۆرێن کۆمی و چەند گۆرێن تاکەکەسییێن ئێزدیان ل شنگالێ و دەردۆرا وێ هاتنە دیتن.
ل گۆر ئامارێن کو ل نەتەوێن یەکگرتی هاتنە پەسەندکرن، هەژمارا ئێزدیا ل ئیراقێ 550 هەزار کەسە؛ ژ بەر رەوشا شنگالێ نها پرانیا ئێزدیان ل دەرڤەیی هەرێمێن خوە دژین.
خەلکێ شنگالێ دبێژن، هەبوونا کۆمێن چەکدار، نەبوونا خزمەتگوزاری و ئارامیێ، سەدەما وێ یەکێیە کو ئەو نکارن ڤەگەرن سەر وار و جهێن خوە، هەروها هەولێن حكوومه‌تا ئیراقێ بۆ ڤەگەراندنا وان ژی،نە جدینە.
