خوەندەکارەکی کورد کو ب مەبەستا خوەندنێ بەرێ خوە دایە رووسیایێ، ل ناڤچەیەکا وی وەلاتی د دەما ئاڤژەنیێ “مەلەڤانیێ” دە خەنقی.
وەزارەتا کارووبارێن بوویەرێن نشکاڤە یا رووسیایێ راگھاند، ئێڤارا 4ێ تەباخا 2023، پەیامەک گھشتیە بەشا ھاوارچوونێ یا وەزارەتێ دەربارێ بوویەرەکێ دە ل چەمێ ڤۆلکھۆڤ، ل گۆر داخویانیا وەزارەتا رەوشا ئاوارتەیا ھەرێمێ، تەرمێ خوەندەکاری ھاتیە دیتن.
شاھدێن بوویەرێ دبێژن، ل دووریا 300 مەتران ژ قەراخا باژێری، خوەندەکار د دەما ئاڤژەنیێ دە خوە نۆقی ئاڤێ کریە و ب سەر ئاڤێ دە نەکەتیە.
پشترە تیما رزگارکرنا ژ ئاڤێ یا ناڤچەیێ و تیما لێگەرینێ و تیمەکا ھاوارچوونێ یا پتۆفیشنال شاندنە جھێ بوویەرێ، د دەمژمێر 17:20 خولکان دە تەرمێ جوانێ کورد ھاتیە دیتن.
جوانێ کو د ئاڤێ دە خەنقی، خوەندەکارەکی کوردە، ناڤێ وی عەلی ئیمانییە و خەلکێ رۆژھلاتێ کوردستانێ یە و 18 سالییە. ب مەبەستا خواندنێ بەرێ خوە دایە رووسیایێ.
ل سەر بوویەرێ، بەشا لێکۆلینێن باژارێ “ڤیلک نۆڤگۆرۆد” ل لژنەیا لێکۆلینێ ژ بۆ ناڤچەیا نۆڤگۆرۆد پشکنینا بەریا لێکۆلینێ ئەنجام ددە.
بەشا لێکۆلینێ ھشیاریێ ددە کو ھەر سال ژ بەر پابەندنەبوونا ب یاسایێن سلامەتیێ، چەندین کەس دبن قوربانی و د ناڤ ئاڤێ دە جانێ خوە ژ دەست ددن.
