پاش فه‌رمانا 2014ان یا شه‌نگالێ هه‌تا پاش رزگار كرنێ، پارتیا كاركه‌ران ب ئاوایه‌كی سیستماتیك كه‌تییه د ناڤا هه‌ولێن تێكدانا شه‌نگالێ و خاپاندنا گه‌لێ و ده دخوازه ب ئایدۆلۆژییا خوه هه‌ر تشتی ب گوهه‌رینه وه‌كه نه‌ریت، ئۆل و باوه‌رداری، ژێیاتییا نه‌ته‌و و كوردبوونێ ژی، ب كورتاسی پارتیا كاركه‌ران ل سه‌ر مه‌ژیكێ وان هه‌ر تشتی دكه.
خوه‌سه‌رییا شه‌نگالێ و هیلالا شیعی
د 9 سالێن ده‌رباسبوویی ده پارتیا كاركه‌ران كو بوویه سه‌ده‌ما كاڤل و وێران مانا شه‌نگالێ و هه‌ر وها هشت كو گه‌لێ وێ د كامپان ده بمینه و ڤه‌نه‌گه‌ره وارێ خوه، ئیرۆ هاتیه د سه‌ر ئیراده‌یا گه‌لێ شه‌نگالێ ده بانگا خوه‌سه‌رییا شه‌نگالێ دكه و ب فیتا ئیرانێ و حه‌شدا شه‌عبی ئێزدییان د خاپینه و دخوازه وارێ وان بكه به‌شه‌كی هیلالا شیعی.
پارتیا كاركه‌را د سالڤه‌گه‌را 9ێ یا فه‌رمانا شه‌نگالێ ده، رابوویه ل یێك ژ ئۆتێلێن به‌غدا هنه‌ك ژ رێبه‌رێن شیعه‌یێن نێزی ئیرانێ و حه‌شدا وه‌لائی مێهڤان كرنه و ل سه‌ر ناڤێ ئێزدییان كونفه‌رانسه‌ك ب ناڤێ خوه‌سه‌رییا شه‌نگالێ ل دارخستیه.
پارتیا كاركه‌ران فه‌رمانا ئێزدییان پڕ بێ واته دبینه
پارتیا كاركه‌ران ئه‌و قاس مژارا شه‌نگالێ و فه‌رمانێ بچووك و بێ واته كریه كو رابووییه ل سالۆنه‌كه هه‌ری بچووك یا ئۆتێلێ ده و بێی كو ت یێك ژ رایه‌دارێن حكوومه‌تا ئیراقێ یان مالباتێن ره‌سه‌ن یێن شه‌نگالێ و كه‌سوكارێن قوربانیێن فه‌رمانێ ئاماده ببن، ل سه‌ر ناڤێ وان بانگا خوه‌سه‌ریێ ژ بۆی شه‌نگالێ دكه.
پارتیا كاركه‌ران ل جیهێ كو ل په‌ی بانگا حكوومه‌تا ئیراقێ و حكوومه‌تا هه‌رێما كوردستانێ و ده‌وله‌تێن ناڤنه‌ته‌وی یێن وه‌كه به‌ریتانیا وه‌ره كو ل رۆژێن دره‌باسبوویی خوه‌ست په‌یمانا شه‌نگالێ یا سالا 2020ێ وه‌ره جی ب جی كرن ژ بۆ كو داوی ل ده‌رده‌سه‌ریێن شه‌نگالێ و گه‌لێ وێ بێ، رابوویه ژ نوو ڤه بانگا خوه‌سه‌ریێ و قوتكرنا شه‌نگالێ ژ كوردستانێ دكه، پارتیا كاركه‌ران ب ناڤێ خوه‌سه‌رییا شه‌نگالێ ئێزدییان دخاپینه و به‌رژه‌وه‌ندییان بۆ رێخستنا خوه ب ده‌ست تێخه.
هه‌ولێن تێكدانا جڤاكا ئێزدی ده‌وام دكن
گه‌لێ ئێزدی، ژ گه‌لێن ره‌سه‌ن یێن كوردستانێ نه، هه‌رچه‌ند كو ب ده‌هان فه‌رمان ب سه‌رێ وان هاتنه، لێبه‌لێ وان قه‌د ده‌ڤ ژ نه‌ته‌و، ئۆل و نه‌ریتێن خوه به‌رنه‌دانه، وان قوربانیێن هه‌ری مه‌زن ژ بۆی مانا خوه دانه، ل همبه‌ری پێتری 70 فه‌رمانان ل به‌ر خوه دان، ل به‌ر هه‌ولێن قڕكرنێ راوه‌ستان، لێبه‌لێ پارتیا كاركه‌ران ژ نوو هاتییه هه‌ولا تێكدانا ڤێ جڤاكا ره‌سه‌ن دده، دخوازه ڤێ جڤاكێ ته‌مام بخه ژێر خزمه‌تا رێكخستنا خوه.
