پارێزەرێ سه‌لاحه‌ددین دەمیرتاش رادگهینە، دادگەها ئەنقەرەیێ دێ 7 جاران جەزایا هەتاهەتایێ یا گران بدە دەمیرتاش و سیاسەتمەدارێن هه‌ده‌پێ.
ماهسونی کارامان، پارێزەرێ هەڤسەرۆکێ بەرێ یێ هه‌ده‌پێ یێ زیندانکری سه‌لاحه‌ددین دەمیرتاش، ب ریا هەژمارا خوە یا مەدیایا سۆسیال تویته‌رێ، د دەربارێ دۆزا کۆبانیێ دە پێشبینییا خوە ئەشکەرە کر و گۆت: دادگەها ئەنقەرەیێ ژ بەر داخویانیا 6ێ جۆتمەها 2014ان، دێ هەری کێم 7 جاران جەزایا هەتا هەتایێ یا گران بدە دەمیرتاش و سیاسەتمەدارێن هه‌ده‌پێ.
کارامان دیار کر کو ئەڤ داخویانی نکارە ببە سەدەما سووجدارکرنا کوشتنێ یان ژی تەشویقکرنا هەولدانا کوشتنێ.
پارێزەرێ دەمیرتاش ئاماژە کر کو ئەڤ نە حەنەکە، لێ راستییە و ژ رایا گشتی خوەست بێ سەر خەتێ.
د دۆزا کۆبانیێ دە 108 کەس کو پرانیا وان سیاسەتمەدارێن هه‌ده‌پێ نه تێن دادگەهکرن و ب تێکدانا هەڤگرتیبوونا خاک و یەکبوونا دەولەتا ترکیەیێ تێن تۆهمەتبارکرن.
دەستپێکا بوویەرێن کۆبانی
د ئیلۆنا 2014ان دە داعشێ ئێرشی کۆبانی کر کو نفووسا وێ نێزیکی 55 هەزار بوو. د 5ێ جۆتمەهێ دە داعش کەتە ناڤا باژارێ کۆبانی. ژ بۆ پشتگریا کۆبانی ژ ترکیەیێ داخوازا ڤەکرنا کۆریدۆرا مرۆڤی هات کرن.
لژنەیا رێڤەبەر یا ناڤەندی یا هه‌ده‌پێ بانگ ل وەلاتیان کر کو ب داخوازا ڤەکرنا کۆریدۆرا مرۆڤی دەرکەڤن کوچە و کۆلانان. چالاکیێن پرۆتەستۆیێ ل 35 باژار و 96 ناڤچەیێن باکورێ كوردستانێ و ترکیەیێ هاتن کرن.
د چالاکیان دە شەر و ئالۆزی دەرکەت. ل گۆری چاڤکانیێن فەرمی 37 کەسان جانێ خوە ژ دەست دان؛ ل گۆری راپۆرێن کۆمەلەیا مافێن مرۆڤان د 7 و 12ێ جۆتمەهێ دە 46 کەسان جانێ خوە ژ دەست دا و پرانیا وان ئەندام و ئالگرێن هه‌ده‌پێ بوون. د بوویەران دە ژ 760ی زێدەتر کەس ژی بریندار بوون.
پێڤاژۆیا دەستپێکرنا دۆزا بوویەرێن کۆبانی
دەربارێ بوویەران دە لێپرسن هات ڤەکرن لێ دۆزا کۆبانی پشتی 7 سالان هات ڤەکرن.
د گولانا 2016ان دە پارێزبەندییا هن پارلەمەنتاران هات راکرن و هەڤسەرۆکێن هه‌ده‌پێ سه‌لاحه‌ددین دەمیرتاش و فیگەن یوکسەکداغ ژی د ناڤ دە ب دەهان سیاسەتمەدارێن هه‌ده‌پێ هاتن دەستەسەرکرن و زیندانکرن.
سەردۆزگەریا کۆماری یا ئەنقەرەیێ دەربارێ 108 کەسان دە دۆز ئامادە کر. دۆز کۆبانی ژ 3 هەزار 530 رووپەلان پێک تێ. تاوانبار ژ 29 تاوانێن جودا تێن دارزاندن و سزایێن گران ژێ رە تێن خوەستن.
