شاندەکە پارێزگاریا شرنەخێ سەردانا ئیدارەیا سەربخوەیا زاخۆیێ کر و تەکەزی ل سەر وێ یەکێ کر کو پلانا وان یا جدی ھەیە ژ بۆ چارەسەرکرنا گلیێن دەریێ سینۆری یێ ئیبراھیم خەلیل.
ئیرۆ چارشەمبێ 9 تەباخا 2023، شاندەکا پارێزگاریا شرنەخێ ب سەرۆکاتیا والیێ شرنەخێ عۆسمان بیلگین سەردانا ئیدارەیا سەربخوەیا زاخۆیێ کر و ژ ئالیێ سەرپەرشتیارێ ئیدارەیا زاخۆیێ گوھدار شێخۆ ڤە ھات پێشوازیکرن.
گوھدار شێخۆ د کۆنفەرانسا رۆژنامەڤانیێ یا ھەڤبەش دە لگەل عۆسمان بیلگین راگھاند، سەردانا شاندا پارێزگاریا شرنەخێ بەردەوامیا پێوەندیێن ناڤبەرا ھەردو ئالیانە د وارێن مرۆڤی و ئابۆری و بازرگانیێ دە، تەکەزی ل وێ یەکێ ژی کر کو پێوەندیێن د ناڤبەرا ھەر دو ئالیان دە بەردەوام دبن و ل سەر ئاستێن دن ژی د وارێ بازرگانیێ دە زێدەتر تێ پێشخستن. ھەر وھا دەستنیشان کر کو دەریێ سینۆری یێ خابوورێ ژ بۆ ھەرێما کوردستانێ و تەمامێ ئیراقێ ژی گرینگە، ب تایبەتی د وارێ ئابۆریێ دە.
پارێزگارێ شرنەخێ عۆسمان بیلگین راگھاند، بەرنامەیەکا وان یا جدی دێ ھەبە ژ بۆ چارەسەرکرنا کێشەیێن ل بەر ھاتووچوونا ل دەریێ سینۆری یێ ئیبراھیم خەلیل، دا کو ئەو قەرەبالغیا ل دەریێ سینۆری بهێت کۆنترۆلکرن، گۆت کو ب تایبەتی ژی ژ بۆ ھاتووچوونا کەسێن کو ب مەبەستا نەخوەشی یان گەشتیاری یان سەدەمەک دن سەردانا ترکیێ دکن، رێیەکا چارەسەریێ بهێت دیتن.
عۆسمان بیلگین ئەشکەرە کر، ل گۆر پلانێن کو ھاتنە دانین، د ناڤا چەند رۆژێن بێ دە ژ بۆ وان کێشەیێن کو تێن پێشیا ھاتووچوونا ل دەریێ سینۆری یێ ئیبراھیم خەلیل، دێ چارەسەری بێنە دیتن.
داویا مەھا بۆری، شاندەکا ئیدارەیا سەربخوەیا زاخۆیێ ب سەرۆکاتیا سەرپەرشتیارێ ئیدارەیا زاخۆیێ گوھدار شێخۆ سەردانا پارێزگەھا شرنەخێ یا باکورێ کوردستانێ کربوو و ھەژمارەک گلی و تێبینیێن خەلکێ ھەرێما کوردستانێ گھاندبوو پارێزگارێ شرنەخێ.
