دیسا ل وانێ ھەموو جورە مەش و چالاکی ژ بۆ دو رۆژان ھاتن قەدەغە کرن

 ل پارێزگەھا وانێ یا باکورێ کوردستانێ ب بریارا پارێزگاریێ مەش، چالاکی و جڤینێن ل دەرڤە 2 رۆژان ھاتن قەدەغەکرن.

پارێزگاریا وانێ ب داخویانیەکێ راگھاند کو رۆژێن شەمبی و یەکشەمبێ 12 و 13 تەباخێ بریارا قەدەغەیا چالاکیان ھاتە دایین.

د ناڤ وان چالاکیان دە مەش، کامپانیایێن ئیمزەیان، چێکرنا راپرسیان، ڤەدانا کۆن و ستاندان، داخویانیێن چاپەمەنیێ، بەلاڤکرنا بەلاڤۆکان، خوەپێشاندان، چالاکیێن روونشتنێ و جڤینێن بکۆمێن ل دەرڤە 2 رۆژان ھاتنە قەدەغەکرن.

پارێزگاریا وانێ دبێژە کو قەدەغە “ژ بۆ رێگرتنا ل ئێرشان”، “پاراستنا جان و مالێ وەلاتیان”، “ژناڤبرنا رێخستنێن تەرۆرێ”” و “پێکانینا ئەولەھیا نشتیمانی” ھاتیە راگھاندن.

ل گۆری داخویانیێ، قەدەغە وان چالاکیان ل خوە ناگرە کو ب دەستوورا پارێزگاریێ نە.