چەکدارێن پەکەکێ ل دێرالۆکێ تەقە ل ھێزێن پێشمەرگە کرن

 چەکدارێن پەکەکێ ل سینۆرێ قەزایا ئامێدیێ تەقە ل خالەکا پشکنینێ یا ھێزێن پێشمەرگە کرن و ھێزێن پێشمەرگە بەرسڤا تەقەیان دا.

ژێدەرەکی ئاگاھدار ژ ناڤچەیێ ژ کوردستان24ێ رە راگھاند: “ڤێ سپێدێ چەکدارێن پەکەکێ تەقە ل خالەکا پشکنینێ یا پێشمەرگە کرن، ژ ئالیێ ھێزێن پێشمەرگە ڤە بەرسڤا وان ھات دایین، خوەشبەختانە چ زیانەک نەگھشتیا پێشمەرگەیان، لێ زیانێن پەکەکێ نایێن زانین.”

ھەر وھا ئەشکەرە کر: “ب مەبەستا پاراستنا رەوشا ئەولەھیا ناڤچەیێ، ھێزێن پێشمەرگە خالەکا پشکنینێ ل سینۆرێ ئامێدیێ دانینە، دیارە ژ چەکدارێن پەکەکێ رە نە خوەشە کو رەوشا ئەولەھیا ناڤچەیێ ئارام بە و ئاساییش بەرقەرار بە، لۆما ل ھەمبەر دانینا وێ خالێ تەقە کرنە.”

ھەمان ژێدەر دیار کر: “چەکدارێن پەکەکێ ژ بلی کو بوونە سەدەما بۆمبەباران و تۆپبارانکرنا ناڤچەیێ ژ ئالیێ ئارتێشا ترکیێ ڤە، دخوازن ھێزێن پێشمەرگە ل وێ دەرێ نەبن کو ل گۆر یاسایان تەنێ پێشمەرگە و ھێزێن ئەولەھیێ یێن کوردستانێ دکارن دەڤەرێن سینۆری یێن ھەرێما کوردستانێ بپارێزن.”