سەرۆکوەزیرێ ھەرێما کوردستانێ مەسروور بارزانی ئیرۆ دوشەمبێ سەردانا چەند تاخێن باژارێ دوھۆکێ کر، لگەل خەلکێ جڤیا و گوھداری داخوازێن وان کر.
سەرۆکوەزیرێ ھەرێما کوردستانێ مەسروور بارزانی سەردانا تاخێن مالتا، بارۆشکا و رەزا کر و گوھ دا داخوازێن خەلکێ وان تاخان و ئامادەھیا حکوومەتا خوە بۆ خزمەتکرنا تاخێن ھەژار نیشان دا.
د بەردەوامیا جڤینا خوەیا ل گەل خەلکێ دە سەرۆکوەزیر مەسروور بارزانی گۆت: ئەز ئیرۆ ب فەرمانا سەرۆک بارزانی ھاتمە سەردانا وە، ئەوا د شییانا مە وەک حکوومەتا ھەرێمێ دە بە، ئەم دێ خزمەتا وە و تاخێن وە بکن.
یەک ژ داخوازێن تاخا مالتایا دوھۆکێ، چاککرنا رێیێن تاخا وان بوو. سەرۆکوەزیر مەسروور بارزانی ژی سۆز دا کو ھەموو داخوازێن وان جیبجی بکە.
سەرۆکوەزیر مەسروور بارزانی دێ ئیرۆ سەردانا ئیدارەیا سەربخوەیا زاخۆ ژی بکە و دێ سەردانا چەند تاخ و ناڤچەیێن زاخۆیێ بکە و دێ پرۆژەیا گەشتیاری یا کۆرنیشا دەلال ڤەکە.
پرۆژەیا گەشتیاریێ یا کۆرنیشا دەلال، یەک ژ مەزنترین پرۆژەیێن گەشتیاریێ ل ھەرێما کوردستانێ و ئیراقێیە، ژ ئالیێ حکوومەتا ھەرێما کوردستانێ ڤە ب 15 ملیار دیناران ھاتیە دروستکرن.
پرۆژەیا کۆرنیشا دەلال ل سەر رووبەرەک 75 ھەزار مەترێن چارگۆشە ھاتیە چێکرن، ژ سەدی 70 پرۆژەیێ قادێن کەسکە و دەرفەتا کار ژ بۆ زێدەتری 2 ھەزار کەسان پەیدا بکە.
