ل عەفرینێ چەتەیێن ترکیێ دەستدرێژی کرە سەر کەچەکا کورد یا 14 سالی

ھاتە راگھاندن کو ل ناڤچەیا جندرێسێ یا عەفرینێ کەچەکا 14 سالی ژ ئالیێ ئەندامێن کۆمێن چەکدار ڤە ھاتیە رەڤاندن و راستی دەستدرێژیا سێکسی ھاتیە.

رێخستنا مافێن مرۆڤان یا عەفرینێ راگھاند کو ل ناڤچەیا جندرێسێ یا باژارێ عەفرینێ کەچەکە 14 سالی ژ ئالیێ چەکداران ڤە ژ مالا وێ ھاتیە رەڤاندن.

ل گۆری داخویانیا رێخستنێ، زارۆکا 14 سالی ژ ئالیێ خەباتکارێ مەجلیسا خوەجھی یا عەفرینێ ناسر بوستانی و کورێ وی زەکاریا بوستانی ڤە ب چەکی ژ مالا وێ یا ل گوندێ تل سلۆرێ ھاتیە رەڤاندن.

فەرماندارێ کۆما ئەمشات ئەنەس ئەل-حەمدۆ کو یەک ژ کۆمێن چەکدارێن ل عەفرینێ یە ژی ئالیکاریا ڤان کەسان کریە.

د داخویانیێ دە ھات دیارکرن کو کەچا کو راستی دەستدرێژییا سێکسی ھاتیە ژ بۆ ب تەجاوزکارێ خوە رە بزەوجە ب زۆرێ ھندەک بەلگە ئیمزە کرنە.

ھەر وھا ھات راگھاندن کو زارۆک و مالباتا وێ د بن گەفا کۆمێن چەکدار دە نە.

د 20 چلەیا 2018 دە ئارتێشا ترکیێ ب بەشداریا گرووپێن چەکدار ل دژی عەفرینێ ئۆپەراسیۆنا ب ناڤێ “شاخێ زەیتوونێ” دابوو دەستپێکرن. د 18 ئادارا ھەمان سالێ دە، پشتی 58 رۆژان ژ شەر و بۆردوومانان، عەفرین کەتبوو بن کۆنترۆلا ھێزێن چەکدارێن ترکیێ و کۆمێن چەکدار. ژ وێ دەمێ ڤە عەفرین ب نووچەیێن بنپێکرنا مافێن مرۆڤان و گوھەرتنا دەمۆگرافی کەت رۆژەڤێ.

تێ دیارکرن کو د ناڤا 5 سالێن داوی دە ژ بەر زەختێن ڤان ھێزان زێدەتری 300 ھەزار کورد ژ جھ و وارێن وان ھاتنە دەرخستن و دار، زەڤی و ملکێن وان ھاتنە دەستەسەرکرن. ھات راگھاندن کو ب دەھان کەس ژ بۆ فیدیەیێ دیل ھاتنە گرتن، ئیشکەنجە ل وان ھاتیە کرن و ھندەکان ژی ژیانا خوە ژ دەست دانە.