چەکدارێن پارتیا كاركه‌ران مالا موختارێ گوندەکێ گرێدای قه‌زا باتووفا یا ل باشوورێ کوردستانێ TNT کری یە.
ل گۆر ئاگاهیێن تایبەت یێن پێگەها «دارکا مازی»، ولاتیێن گوندێن ریسێ و شیلانێ یێن سەر ب باژارۆکێ باتیفا، پشتی رەزامەندی ژ سازیێن حکوومی یێن باشوورێ کوردستانێ وەرگرتی، سەرەدانا گوندێن خوە کرنە ژ بۆی کو بکارن کارێ خوە یێ چاندنیێ ل ور بەردەوام بکن، لێ گوندێن وان یێن بوویە قادا شەرێ پەکەکێ و دەولەتا ترکیێ.
چاڤکانیێن پێگەها «دارکا مازی» ئاشکەرە کرن، دەما ولاتیێ ب ناڤێ «حاجی سادق سەلیم» کو موختارێ گوندێ ریسێ یە دچە ناڤا مالا خوە دە دبینە کو مالا وی ب تەمامی ژ ئالیێ چەکدارێن پەکەکێ ڤە هاتیە TNT کرن.
چاڤکانیێن «دارکا مازی» هەر وەها راگهاندن، گومان تێ کرن چەکدارێن پەکەکێ ئەڤ مالە ژ بۆی وێ یەکێ بۆمبە کربە کو دەما لەشکرێ ترکیێ ئێریش دکە ب وان دە بتەقینە.
پرانیا گوندێن باشوورێ کوردستانێ یێن سینۆری ژ بەر شەرێ پەکەکێ و ئارتێشا ترکیێ ڤالا بوونە و شێنیێن وان گوندان ژ نەچاری نها د باژار و باژارۆکێن کوردستانێ دە جیهـ بوونە و ئەڤ ژی ژ وان رە بوویە بارگرانی، ژ بەر کو پرانیا وان ل گوندێن خوە مژوولی کارێ چاندنیێ و خوه‌دیكرنا په‌ز بوون و نها نکارن وان کاران بکن و ب ئاوایەک باش دەبارا ژیانا خوە بکن.
