رێڤەبەریا خوەسەر یا ل رۆژئاڤایێ کوردستانێ ب داخویانیەکێ بانگ ل جڤاکا ناڤدەولەتی کر کو ژ بۆ ئاڤاکرنا ناڤەندێن پەروەردەکرنا زارۆکێن داعشێ و تەڤلێکرنا وان د جڤاکێ دە، ھەڤکاریا وێ بکن.
رێڤەبەریا خوەسەر دوھی د داخویانیێ دە راگھاند، دێ د پەیداکرنا جھ، پێدڤیێن گرتیگەھان و پاراستنا ھەرێمێ ژ مەترسیێن داعشێ دە گەلەک زەحمەتی کشاندنە و بانگ ل جڤاکا ناڤدەولەتی کر ئالیکاریان پێشکێش بکن دا کو دارزاندنا چەتەیێن داعشێ چالاک ببە و عەدالەتا جڤاکی و یا ناڤدەولەتی پێک وەرە.
ھەروھا رێڤەبەریێ گۆت: “دۆسیەیا زارۆکێن داعشێ، مەترسیدار ە. دڤێت ناڤەندێن پەروەردەکرنا وان بێ ڤەکرن، ژ بۆ کو تەڤ ل جڤاکێ بێن کرن. ئەو قوربانیێن ھزرا تەرۆریستن. پەروەردەکرنا وان دێ رێ ل پێشیا خەتەرەیەکە پێشەرۆژی بگرە و دێ باندۆر ل سەرانسەری جیھانێ بکە. ھەر دەرەنگمایینەک ژی ڤێ خەتەرەیێ زێدەتر دکە.”
رێڤەبەریێ د داخویانیا خوە دە دەستنیشان کر، بانگا وێ ل جڤاکا ناڤدەولەتی، ژ بۆ کو رێ ل پێشیا فرەھبوونا ڤێ ھزرا توندرەو بێ گرتن و بەرژەوەندیا بلند یا پێکھاتەیێن ھەرێمێ وەرە پاراستن.
ھەروھا رێڤەبەریێ ئامادەھیا خوە ژ بۆ پاراستنا پێشەرۆژا وان زارۆکان دکارە تەڤ ل بەرنامەیێن جڤاتا ناڤنەتەوەیی و رێخستنێن پەیوەندیدار ببە.
