حكوومه‌تا هەرێما کوردستانێ ب هەماهەنگی ل گەل هەڤپەیمانان ژ بۆ کوردستانەکە بهێز، بریارا یەکخستن و برێکخستنا هێزێن پێشمەرگە د چارچۆڤەیا وەزارەتا پێشمەرگە یا حكوومه‌تا هەرێما کوردستانێ دە دا. د پێنگاڤا داوی دە، ب بریارا سەرۆکوەزیر مەسروور بارزانی 3 لیوایێن نوو هاتن دروستکرن و ب سەر وەزارەتا پێشمەرگە ڤە هاتن خستن.
هەرسێ لیوایێن کو ڤێ داویێ هاتنە ئاڤاکرن، لیوایێن 26، 28 و 30ن و هەژمارا وان 5 هەزار و 400 ئەفسەر و پێشمەرگەیێن یەکینەیا 70ێ نە. نها ئەو د بن فەرماندارییا لیوایا دویەما سەرئەرکانیێ دە تێن کۆمکرن.
رێڤەبرێ گشتییێ کاروبارێن تەکان و خوەبەخشان د وەزارەتا پێشمەرگە دە لیوا حکمەت عومه‌ر ژ مالپەرا فەرمی یا حكوومه‌تا هەرێما کوردستانێ رە راگهاند: «سەرۆکوەزیرێ هەرێما کوردستانێ مەسروور بارزانی ژ دەستپێکا کابینەیا نەهەم ڤە ب ئالیکارییا تیما هەڤپەیمانان، ب ریا تیمەکە نوو فەرمانا چاکسازیێ د ناڤا هێزێن حكوومه‌تا هەرێما کوردستانێ دە دا و هەتا نها بەردەوامە. د ڤێ کابینەیێ دە ژی، لیوایێن 15، 17، 18، 19، 21، 22، 23، 24، 26 و 30 و لیوایێن 25 و 27، د ناڤ پرۆسەیێ دە نە و %90 کارێ وان بداوی بوونە و د دەمەک نێزیک دە دکەڤە سەر میلاکێ وەزارەتا پێشمەرگە».
لیوا حکمەت عومه‌ر گۆت ژی: «ل گۆری رێنمایێن لەشکەری و ل گۆری یاسایا چاکسازیێ یا هەژمار 38، ئەمێ ب رێیا کۆمیتەیان رە هەڤدیتنێن ل گەل هەموو هێزان بکن تا کو ڤەگوهەزینن سەر میلاکا وەزارەتا پێشمەرگە».
مالپەرا حكوومه‌تا هەرێما کوردستانێ راگهاند، د چارچۆڤەیا هەولێن کابینەیا نەهەم دە، هێزێن پشتەڤانیا یەک و دو ژی بۆ میلاکا وەزارەتا پێشمەرگە هاتنە ڤەگەراندن. د چارچۆڤەیا چاکسازیێن حكوومه‌تێ دە هەتا نها 28 لیوا هاتنە ئاڤاکرن. پرۆسەیا د بن چاڤدێرییا هێزێن هەڤپەیمانان و وەزارەتا پێشمەرگە دە دێ هەتا 2-3 سالێن دن ل هەموو هێزێن حكوومه‌تا هەرێما کوردستانێ بەردەوام بکە.
