شەرێ کو ل باژارۆکێ دهێ یێ سەر ب باژارێ سێرتێ دەستپێ کربوو و ل باژارێن دن یێن باکورێ کوردستانێ بەلاڤ ببوو، پشتی 39 سالان نە ل ورە، لێ ل سەر سینۆرێ هەرێما کوردستانێ و رۆژئاڤایێ کوردستانێ ئاسێ بوویە.
پێڤاژۆیا شەرێ چەکداری یێ پهكهكێ چەند درێژ بکە ژی، نێرینا کو چ سوودا ڤی شەری ژ بۆ چارەسەرکرنا پرسا کوردی نەمایە، ل ناڤ جڤاک و سیاسەتا کوردی زال دبە.
هەری داوی ژ ناڤ ههدهپێ د ئاستا هەری بلند دە هەڤسەرۆکێ بەرێ یێ وێ پارتیێ یێ زیندانیکری سەلاحەددین دەمیرتاشی بانگا دانینا چەکان ل پهكهكێ کربوو.
ڤێ داویێ بانگێن ب ڤی رەنگی هەر زێدە دبە و تێ خوەستن کو ژ بۆ چارەسەرکرنا پرسا کوردی دەرفەت بۆ رێ و رێبازێن دەمۆکراتیک و یاسایی بێ دایین.
پارلامەنتەرێ بەرێ یێ پارتیا دەمۆکراتیکا گەلان (ههدهپه) ئالتان تان ژ ک24ێ رە گۆت: «دڤێ پهكهكه دەست ژ شەرێ چەکداری بەردە و ژ بۆ چارەسەرکرنا پرسا کوردی رێ و رێبازێن یاسایی و دەمۆکراتیک وەرن بکارئانین کو هلبژارتنێن شارەداری و پارلامەنتۆیێ یەک ژ وان رێیانن».
ئەرۆل کاترجۆگلو کو پارلامەنتەرێ بەرێ یێ ههدهپێ یە و ئابۆریناسەکی دیارێ ترکیەیێ یە ئەشکەرە دکە، چارەسەرنەکرنا پرسا کوردی و شەر تریلیۆن دۆلاران زەرەر گهاندیە ئابۆریا ترکیێ. دڤێ پهكهكه دەست ژ چەکان بەردە و حكوومهتا ترکیێ ژی پرسا کوردی چارەسەر بکە.
ئەرۆل کاترجۆگلو گۆت: «تێ بەحسکرن کو زەرەرێن ئابۆری یێن شەری ژ سێ تریلیۆن دۆلاران هەتا 40 تریلیۆن دۆلارانە. ئەڤ قەیرانا ئابۆری کو ئەم تێ دەنە، پارچەیەک ژ قەیرانا سیاسی یە. گەلەک زەلالە کو هەکە ترکیە بکارە پرسا کوردی چارەسەر بکە، دێ پرسێن وێ یێن ئابۆری ژی چارەسەر ببن. ژخوە دڤێ پهكهكه دەست ژ شەرێ چەکداری ژی بەردە و نکارە ب رێیا چەکان تشتەک ب دەست بخە. دڤێ پهكهكه رێ ژ سیاسەتا سڤیل رە ڤەکە و سیاسەتمەدار ژی پشتگریا دایینا مافێن کوردان بکن. دڤێ حکوومەتا ترکیێ مافێ نێزکێ 30 ملیۆن کوردان رادەست بکە».
ژ سالا 1984ێ هەتا نها ژ هەر دو ئالیان نێزکێ 80 هەزار کەس جانێ خوە ژ دەست دان و ئەو هندە کەس ژی بریندار بوون. ئەڤ ئامار ژ دەزگەهێن فەرمی و ناڤنەتەوی و ژ داخویانیێن بەرپرسێن پهكهكێ هاتیە گرتن.
ئەندامێ دەستەیا رێڤەبهر یا پهكهكیێ دووران کالکان ژی حەفتەیا بۆری د تەلەڤیزیۆنەکا پارتیا خوە دە ئەشکەرە کربوو، هەژمارا ئەندامێن وان یێن جانێ خوە ژ دەست دانە گهشتیە نێزکی 50 هەزاران.
ل گۆر ئامارێن ئاژانسا «ئانادۆلو»، وەزارەتا بەرەڤانیێ یا ترکیێ و گرووپا کریزێ یا ناڤنەتەوی و رێخستنێن مافێن مرۆڤان، د شەرێ 39 سالان دە نێزکێ 10 هەزار ئەندامێن هێزێن ئەولەکاریێ و 15 هەزار سڤیل کو پرانیا وان کوردن جانێ خوە ژ دەست دانە. هەر وها 4 هەزار گوند وێران بوونە و نێزکێ ملیۆنەک کەس ژ گوندێن خوە کۆچ کرنە.
دگەل ڤێ ئەنجاما دژوارا 39 سالان کو زێدەترین زەرەرمەندێ وێ کوردن، هەردو ئالی ل سەر بژارەدەیا شەر رژدن و پاشدە گاڤ ناڤێژن.
چاڤكانی: كوردستان 24
