حکوومەتا ترکیێ کوشتنا بەرپرسەکی پەکەکێ ل چیایێ گارە یێ پارێزگەھا دوھۆکێ راگھاند، د ھەمان دەمێ دە ژی فرۆکەیێن شەرێن ترکیێ ئیرۆ ئەو چیا بۆمبەباران کرنە.
ل گۆر ئاژانسا “ئانادۆلو”، دەزگەھا ھاوالگری یا ترکیەیێ (میت) ل چیایێ گارێ ئۆپەراسیۆنەکا تایبەت ل دژی ھەژمارەک گەریلایێن پەکەکێ کریە. د ئەنجامێ دە بەرپرسێ راگھاندنێ و ئارشیڤێ یێ پەکەکێ جەلال بیردال یێ ب ناسناڤ (سیدار سەرحەد) دگەل چەند گەریلایێن پەکەکێ ھاتنە کوشتن.
ل گۆر ھەمان ژێدەرێ، جەلال بیردال ل ھەرێمێن زاپ و خاکورکێ، د گەلەک چالاکیێن ل ھەمبەر ھێزێن ئەولەھیێ یێن ترکیێ پێک ھاتنە دە خوەدی رۆل بوویە.
لێ مەدیایا پەکەکێ ئەڤ نووچە ھەفتەیا بۆری راگھاندبوو کو ھێزێن پاراستنا گەل (ھەپەگێ) ناسنامەیا چار گەریلایێن خوەیێن کو د 8 تەباخا 2022 دە ل گارێ د ئۆپەراسینەکا ترکیەیێ دە جانێ خوە ژ دەست دابوون ئەشکەرە کربوو کو یەک ژ وان جەلال بیردال (سیدار سەرحەد) بوو.
ژ ئالیێ دن ڤە، ئیرۆ دانێ سبێ فرۆکەیێن شەرێن ترکیێ چیایێ گارە یێ ل پارێزگەھا دوھۆکێ بۆمبەباران کرن.
شەر و پەڤچوونێن د ناڤبەرا پەکەکێ و ترکیێ دە ل ناڤچەیێن سینۆری یێن ھەرێما کوردستانێ، باندەرەکا مەزن ل سەر ژیانا خەلکێ کریە و نێزیکی 800 گوند و چەند دەڤەرێن گەشتیاریێ وێران و ڤالا بوونە.
