جێگرێ ھەڤسەرۆکاتیا ئەنجوومەنا جێبەجێکار یێ رێڤەبەریا خوەسەر حەسەن کۆچەر دبێژە، بیر و کێلگەھێن پەترۆلێ یێن ناڤچەیێن وان رۆژانە نێزیکی 150 ھەزار بەرمیلێن پەترۆلێ بەرھەم تینن و بەشەک ژ وێ ژی ب رێیا بازرگانێن سەر ب رێژیمێ ڤە، دفرۆشن ھەرێمێن حکوومەتا سووریێ.
کۆچەر د ھەڤپەڤینەکێ لگەل رۆژنامەیا “شەرق ئەل-ئەوسەت” یا لەندەنی دە دیار کر، رێڤەبەریا خوەسەر کێمتر ژ نیڤا بیر و کێلگەھێن ل دەڤەرێن د بن کۆنترۆلا وێ دە دەرتینە، ئانکو نێزیکی 150 ھەزار بەرمیلان د رۆژێ دە. دا زانین ژی، بەری 2011، رۆژانە نێزیکی 385 ھەزار بەرمیل ژ وان کێلگەھان دھات بەرھەمانین.
کۆچەر تۆمەتێن دزینا پەترۆلێ ژ ئالیێ رێڤەبەریا خوەسەر و ھێزێن ئامەریکی ڤە رەد کر و گۆت، بەشەکێ پەترۆلا وان ب رێیا بازرگانێن سەر ب رێژیمێ ڤە و ب بھایێن سەمبۆلیک ژ بۆ ھەرێمێن حکوومەتا سووریێ تێ فرۆتان.
جیگرێ ھەڤسەرۆکاتیا ئەنجوومەنا جێبەجێکار یا رێڤەبەریا خوەسەر تەکەز کر کو ھەڤپەیمانیا ناڤدەولەتی و ئامەریکا دەستێوەردانێ د پرسا پەترۆلێ دە ناکن و ئەرکێ وان ل سووریێ تەنێ ژناڤبرنا داعشێیە.
کۆچەر دبێژە: ژ دەستپێکا شەرێ سووریێ ڤە، دەڤەرێن بیرێن پەترۆلێ کەتن د بن کۆنترۆلا چەند ئالیێن لەشکەری، پشتی سالا 2014، راستی ئێریشێن گرووپێن چەکدارێن رادیکال و رێخستنێن ئیسلامی یێن توندرەو ھاتن، ڤێ یەکێ باندۆرەکا مەزن ل ڤان کێلگەھ و بیران کر و بەشەک ژ وان ب تەمامی وێران بوون و بەشەک دن ژی زیان گھیشتنێ، ژ بەر وێ رێژەیا بەرھەمانینێ کێم بوو.
دیار کر ژی: داھاتا پەترۆلێ ڤەدگەرە ژ سازیێن رێڤەبەریا خوەسەر و ئەنجوومەنێن خوەجھی یێن کو وان دەڤەران برێڤە دبن، ژ بۆ دابینکرنا خەرجیێن لەشکەری و ھێزێن ئەولەھیێ و مووچەیێن کارمەندان.
ژ بلی بیر و کێلگەھێن ل رۆژئاڤایێ کوردستانێ، زەڤیێن گازێ یێن “ئەل-عۆمەر” و “جۆنجۆ” ل گوندەوارێ دێرازۆرێ ژ سالا 2019 ڤە و کێلگەھا گازێ ل ئەل-جبسا ل گوندەوارێ حەسەکێ ژ سالا 2016 ڤە د بن کۆنترۆلا ھێزێن سووریەیا دەمۆکراتیک (ھەسەدێ) دە نە.
