ل باژارۆکێ گرکێ لەگێ یێ رۆژئاڤایێ کوردستانێ، 2 ئەندامێن پارتیا دەمۆکراتا کوردستانێ – سووریە (پەدەکە-سێ) ژ ئالیێ چەکدارێن پەیەدێ ڤە ھاتن رەڤاندن.
ئەنجوومەنا خوەجھی یا گرکێ لەگێ یا ئەنەکەسێ بەلاڤ کر، دوھی گرووپەکی چەکداران سەر و روویێ خوە گرتبوو ب سەر جھێ کارێ مەدیاکار و ئەندامێ پەدەکە-سێ بەرزان حسێن دە گرت و ئەو رەڤاندن و بەر ب جھەکی نەدیار ڤە برن.
ئەڤ نە جارا یەکەمە مەدیاکار بەرزان حوسێن تێ رەڤاندن، ئەو پێشتر ژی د گولانا 2017 و تیرمەھا 2021 دە ژ ئالیێ ھێزێن سەر ب رێڤەبەریا خوەسەر ڤە ھاتبوو رەڤاندن و دەمەکێ د گرتیگەھێ دە مابوو.
ھەر ل گرکێ لەگێ، دوھی ئەندامەکی دنێ پەدەک-سێ یێ ب ناڤێ جنێد سەید مەجید ژی ژ ئالیێ چەکدارێن پەیەدێ ڤە ھات رەڤاندن و بەر ب جھەکی نەدیار ڤە ھاتیە برن.
پێشتر ب سەدان ئەندام و ئالیگرێن پەدەکە-سێ و پارتیێن د ناڤا ئەنەکەسێ ل باژار و ناڤچەیێن جودایێن رۆژئاڤایێ کوردستانێ ژ ئالیێ ھێزێن سەر ب رێڤەبەریا خوەسەر ڤە ھاتنە رەڤاندن و گرتن و بارەگەھ و ئۆفیسێن وان راستی ئێریش و شەوتاندنێ ھاتنە.
بەرپرسێن ئەنەکەسێ فەرمانداریا ھێزێن سووریەیا دەمۆکراتیک (ھەسەدێ) د بەر ڤان کریاران دە بەرپرس دبینە کو ئەو رێ ل پێش ڤان کریارێن رەڤاندنێ و ئێریشێن ل سەر بارەگاھان ناگرە.
