چاپەمەنیا پەکەکێ بێی کو گوھ بدە چ رەگەزێن ئەخلاقی، نووچەیێن سەختە بەلاڤ دکە دا کو کوردان ل ھەمبەر ھەڤ دەربخە. مەدیایا پەکەکێ ژ چاڤکانیێن کو ناڤێن وان چ جاران نەھاتنە ئەشکەرەکرن نووچەیان پارڤە دکە، ب بەردەوامی خەباتکارێن خوە ب ناسنامەیا گەل ددە نیشاندان، نووچەیێن کو دەرەو و بێەخلاق ل حکوومەتا ھەرێما کوردستانێ دکن پارڤە دکە. دخوازن تۆڤێ دژمناتیی د ناڤ کوردان دە بچینن.
ھەری داوی ژی د ئاخافتنا ئەندامێ پۆلیتبورۆیا پەدەکێ عەلی عەونی دە ئەڤ بێەخلاقی ھاتیە کرن. ئاخافتنا عەلی عەونی د مەدیایا پەکەکێ دە پر ب مەبەست شاش ھات وەرگەراندن. د نووچەیا تەلەڤیزیۆنا مەدیا تیڤی یا پەکەکێ دە دبێژە کو عەونی د ھەڤپەیڤینا خوەیا دگەل تەلەڤیزیۆنەکێ دە، ژ دەولەتا ترک خوەست کو کادرۆیێن پێشەنگ یێن پەکەکێ بکە ئارمانج.
لێ د ئاخفتنا عەلی عەونی دە چ جاران گۆتنەکا وەھا نەبوویە. عەلی عەونی تەنێ خوەست ئەو پرسا د مەژییێ گەلێ باشوورێ کوردستانێ دە ھەیی ئانکو پرسا “پەکەکە ل ھەرێمێن ھوندرێ باشوورێ کوردستانێ چ دکە؟” بەرسڤ بدە.
ئاخافتنا عەلی عەونی وھایە: “ھێزێن پەکەکێ ل دەڤەرێن وەکە ئاخچەلەر و ئەحمەداوا چ دکن، چما ل ور تێن کوشتن؟”
عەلی عەونی شەرێ ناڤبەرا پەکەکێ و ئارتێشا ترک دە ژی وھا شیرۆڤە دکە؛ “پەکەکە، پێشەنگیێ دکە کو ئارتێشا ترک بکشینە کووراھیا باشوورێ کوردستانێ و سەروەریا حوکوومەتا کوردستانێ تێک دبە.”
عەلی عەونی ڤێ پرسا گرینگ یا د سەرێ ھەر کەسی دە دکە: “دەولەتا ترک ل باژاران د ناڤا سەدان مرۆڤان دە کەچ و کورێن فەقیرێن کوردان یێن ھاتین خاپاندن دکوژە. لێ چما رێڤەبەرێن وێ ناکووژە؟ ما وان ناس ناکە؟ گەر هەڤکاریەک د ناڤبەرا پەکەکێ و ترکیێ دە نەبە گەلۆ ما ئەڤ یەک موومکنە؟
ئەڤ پرسا عەلی عەونی نە جارا یەکەمە. ھەر کەس مەراق دکە کو مستەفا قاراسوو یێ کو ب تەنا سەرێ خوە نکارە 50 گاڤان باڤێژە چاوا نابە ئارمانج. ئان ژی جەمیل بایکە، مەراق دکم کو چاوا ژ سالا 1985 و ڤر ڤە جارەکێ ژی بریندار نەبوویە و نەبوویە ئارمانجا ئارتێشا ترک. دەردۆرێن سیاسی یێن کو ژ نێزیک ڤە پەکەکێ دشۆپینن دفکرن کو “رێڤەبەرێن دامەزرینەرێن پەکەکێ نە ژ بەر لھەڤکرنا پەکەکێ و دەولەتا ترک نایێن ئارمانجکرن. یێن دبنە ئارمانجا دەولەتا ترک ھەموو فەرماندارێن ئاستا ناڤین و شەرڤانن.
مەدیایا پەکەکێ ژ بۆ کو ڤێ مژارێ د ھشێ ب دەھان ھەزار کوردان دە ڤەشێرە، بێ دودلی گۆتنێن عەلی عەونی شاش وەرگەراندن و د راگاھاندنا خوە دە پارڤە کر.
ھێزا ھەری مەزن و یەکانەیا د دەستێ پەکەکێ دە چاپەمەنیا وێ یە. پەکەکێ د شەری و سییاسەتێ دە وەنداھییێن مەزن دان. پەکەکە شەری ناکە، چاپەمەنی و ھوونەرمەندێن پەکەکێ شەری دکن، پەکەکە سیاسەتێ ناکە، مەدیایا وێ سیاسەتێ دکە. پەکەکە ب ھێزا مەدیایا خوە خیانەت و تێکچوونا خوە ڤەدشێرە.
