ژ بۆ ھلبژارتنێن شارەداریێن ترکیەیێ حەرەکەتا ئازادی ھەلوەستا خوە دیار کر و کۆمەلەیا شۆرەشگەر و دەمۆکراتێن کورد دەدەکەدێ ژی ئاماژە کر کو تفاقا وان یا ل گەل ھەدەپێ ژی ھین نەھاتیە نووکرن و تفاقا بەرێ ژ بۆ ھلبژارتنێن پارلەمەنتۆیێ بوو.
بەریا کو پێڤاژۆیا بانگەشیێ یا ھلبژارتنێن شارەداریان دەست پێ بکە رێخستنێن کوردستانی یێن باکورێ کوردستانێ ژی ھێدی ھێدی دەست ب خەباتێن خوە دکن و ھەلوەستێن خوە و پیڤانێن خوە یێن بۆ جھگرتنا د تفاقەکێ دە ژی دیار دکن. د ڤێ چارچۆڤەیێ دە حەرەکەتا ئازادی ژی ھەلوەستا خوە دیار کر.
حەرەکەتا ئازادی یا کو د ھلبژارتنێن پارلەمەنتۆیێ دە ل گەل ھاکپارێ جھ گرتبوو بریار دایە کو د ھلبژارتنێن شارەداریێ یێن 31 ئادارا 2024 دە دیسا پشتگریا ھاکپارێ دکە و دخوازە تفاقا وان بەرفرەھتر ببە.
سەرۆکێ حەرەکەتا ئازادی مەتین پیرانی راگھاند: “ئەم دخوازن تفاقا مە یا ل گەل ھاکپار و پارتیا دەمۆکراتا کورد ھاتی پێکانین برفرەھ ببە و خەتەکا نەتەوەیی بهێت ئاڤاکرن. خویایە دێ تفاقا مە د ھلبژارتنێن شارەداریان دە ژی بدۆمە.”
کۆمەلەیا شۆرەشگەر و دەمۆکراتێن کورد ژی کو ل گەل ھەدەپێ تفاقەک پێک ئانیبوو و د ھلبژارتنێن 2018 و 2019 دە ل گەل ھەدەپێ تفاق کربوو ددە زانین کو ھین نەدیارە دێ تفاقا وان بدۆمە یان نە لێ رایەدارێن دەدەکەدێ بانگا ئاڤاکرنا خەتەکا نەتەوەیی دکن.
جیگرێ سەرۆکێ دەدەکەدێ عەبدولهادی ئۆکوموش ژی دیار کر: “وەک دەدەکەدە ئەم دخوازین تفاقەکا نەتەوەیی بهێت ئاڤاکرن. تفاقا کو مە دگەل ھەدەپێ پێک ئانی بوو بۆ ھلبژارتنێن پارلەمەنتۆیێ بوو کو پشتی ھلبژارتنێ ژی ھلوەشیا. بەردەوامیا وێ تفاقێ ژی ھین نەدیارە.”
بال تێ کێشان کو بەرنامەیێن پارتی و رێخستنێن کوردستانی کێم زێدە وەک ھەڤن لێ ت جاران نەکارینە تفاقەکا بەرفرەھ د ھلبژارتنان دە پێک بینن کو ئەڤ مژار دێ پێڤاژۆیا بانگەشیا ھلبژارتنان دە گەلەک هێت نیقاشکرن.
