سەکرەته‌رێ په‌ده‌كه-سێ جارەکە دن په‌یه‌ده ب ئاستەنگکرنا دانوستاندنێن کوردی- کوردی تۆمەتبار دکە و رادگهینە، ژ بۆ ڤەگەرا ناڤ دانوستاندنان، ت فشارەکە پێویست ژ ئالیێ ئامەریکا ڤە ل سەر په‌یه‌دێ نینە.
سەکرەته‌رێ پارتیا دەمۆکراتا کوردستان- سووریێ (په‌ده‌كه-س) محەمەد ئسماعیل د هەڤپەیڤینەکێ لگەل رۆژنامەیا فەرمی یا پارتیا خوە «کوردستان» دە دەربارێ دانونستاندنێن کوردی – کوردی دە راگهاند، «دیالۆگا کوردی – کوردی گاڤەکە گرینگ بوو و گەلێ کورد یێ کو ل ئارامیێ دگەرە ب گرنگی لێ دنێرە ژ بۆ کو ئاتمۆسفەرەکە ئەرێنی یەکرێزی و یەکهەلوەستیا کورد پەیدا ببە. تشتێ ئەرێنی ئەوە کو ئالیێ ئامەریکی وەک گەرەنتۆرە و رێکەفتنا دهۆکێ بنگەها وێ یە و ژ بەر هەبوونا ئالیێ ئامەریکی، گاڤەکە باش هات ئاڤێتن. لێ په‌یه‌ده‌ێ ئاستەنگی دەرخستن، تا کو دانووستاندن نەچن سەری».
محەمەد ئیسماعیل گۆت ژی: «په‌یه‌دێ نەبوونا نوونەرێن دیپلۆماتیکێن ئامەریکی ل هەرێمێ و ڤەگوهاستنا دەستهلاتێ ل واشنگتۆنێ ژ کۆماریان بۆ دەمۆکراتان وەک دەرفەت دیت و د وان سێ مەهێن دەستپێکێ دە هەولا شەوتاندنا ئۆفیسێن پارتیێن کوردی دا و کادرۆیێن وان گرتن و داخویانی ل دژی سەرکردەیێن ئه‌نه‌كه‌سێ ئاڤێتن تا کو دانوستاندنان تێک بدە».
دیار کر ژی: «پشتی هەولێن ئامەریکیان یێن دوبارە دەستپێکرنا دیالۆگێ، ئه‌نه‌كه‌سێ بەلگەیەک گارانتی ژ شەش خالان پێشکێش کر کو ئالیێ ئامەریکا و برێز مازلووم عەبدی وەک گارانتۆرێ په‌یه‌دێ ژی ئەو پەژراندن و ل سەر ئیمزە کرن، لێ وان نەکارین ئالیێ دن (په‌یه‌ده) بینن سەر ماسەیا دانوستاندنان».
سەکرەته‌رێ په‌ده‌كه-سێ گۆت ژی: «هین ژی ئالیێ ئامەریکی دانووستاندنێ ل گەل ئالیێن پێوەندیدار دکە، لێ فشارەکە پێویست نینە کو وان نەچار بکە کو رێکەفتنێ بپەژرینن، ژ بەر کو په‌یه‌ده رێکەفتن و هەڤبەشیێ ب ئالیەکی کوردی رە قەبوول ناکە و باوەریا وێ پێ تونەیە».
ئەنجوومەنا نشتیمانی یا کوردی ل سووریێ (ئه‌نه‌كه‌سه) و پارتیێن یەکیتیا نشتیمانی یا کوردی (په‌یه‌نه‌كه) ژ مژدارا 2019ان ڤە ب پشتگریا ئامەریکا، هەرێما کوردستانێ و هه‌سه‌دێ دەست ب دانوستەندنێن یەکرێزیا کوردی و بەشداریا ئه‌نه‌كه‌سێ د ناڤا رێڤەبەریا رۆژئاڤایێ کوردستانێ دە کربوون، لێ ئەڤ دانوستاندن پشتی نێزیکی سالەکێ و بێی گهیشتنا چ پەیمانەکێ راوەستیانە.
چاڤكانی: كوردستان 24
