گرووپێن چەکدار ل باژارێ عەفرینێ 18 کەس ژ بەر نەبەشداریا وان یا د خوەپێشاندانێن دژی بریارا ئامەریکایێ دە دەستەسەر کرن.
مەدیایا ناڤخوەیا سووریێ بەلاڤ کریە، چەکدارێن گرووپا سولتان شاھ ئاڤێتنە سەر مالێن وەلاتیێن باژارێ عەفرینێ یێ رۆژئاڤایێ کوردستانێ و 18 وەلاتی گرتنە، ژ بەر نەبەشداریا وان د خوەپێشاندانێن دژی بریارا ئامەریکایێ یا دەربارێ سەپاندنا سزایان ب سەر گرووپێن ئەمشات و ھەمزاتێ دە.
ھەروھا ل گۆر مەدیایا سووریێ دوھ ژی گرۆپێن چەکدار 16 فەرمانبەر ل سەرێ کانیێ ب ھەمان تۆمەتێ گرتنە.
رۆژا پێنجشەمێ 17 تەباخا 2023، وەزارەتا گەنجینەیا ئامەریکایێ راگھاند، ژ بەر چەوساندن و بنپێکرنا مافێن مرۆڤان و دەربەدەرکرنا وەلاتیێن کوردێن ل عەفرینێ، گرووپێن چەکدارێن لیوایا سولەیمان شاھ، گرۆپا ھەمزات و سێ ژ سەرکردەیێن وان گرۆپان و کۆمپانیەکا یەک ژ وان سەرکردەیان، خستن ناڤ لیستەیا سزایان.
د داخویانیا وەزارەتا گەنجینەیا ئامەریکایێ دە ھاتیە دیارکرن، لیوایا سولەیمان شاھ نشتەجیێن کوردێن عەفرینێ کرنە ئارمانج و چەندین بنپێکرن ل دژی مافێن مرۆڤان ئەنجام دانە.
وەزارەتێ بال کشاندیە سەر وێ یەکێ کو گرۆپێن چەکدار خەلکێ کورد ل عەفرینێ رەڤاندنە و نەچار کرنە کو مال و ملکێ خوە ب جھ بھێلن، ئان ژی گەلەک پەرە ژ بۆ ئازادکرنا مال و ملک و ئەندامێن مالباتا خوە بدن.
بەحسا وێ یەکێ ژی ھاتیە کرن کو ھەرێما عەفرینێ ھەتا رادەیەک بلند ژ ئالیێ گرۆپێن چەکدار ڤە ھاتیە کۆنترۆلکرن، کو پرانیا وان توندووتووژیێ ب کار تینن ل ھەمبەر خەلکێ. ڤان گرۆپێن چەکدار ئێش و ژانێن خەلکێ زێدە کرنە کو ژ بەر چەندین سالێن شەرێ ناڤخوە ل باکورێ سووریێ دروست بوویە و رێگری ل ڤەژاندنا ناڤچەیێ کرنە ب بەشداربوونا بنپێکرنا جدی یا مافێن مرۆڤان ل دژی نشتەجیێن ھەرێمێ.
