سەرۆک مەسعوود بارزانی ئەڤ چەند رۆژن ل دهۆکێ و ناڤچەیێن وێ ب خەلکێ رە دجڤە، سەرۆک بارزانی ئیرۆ ژی ب مامۆستە و ئاکادەمیسیەنێن هەرێما بادینانێ رە جڤیا و بانگ ل وان كر كو ژ بۆ خورتکرنا هەستێن وەلاتپەروەریێ و بهەڤرەژیانێ بخەبتن.
سەرۆک مەسعوود بارزانی د ڤێ جڤینێ دە ئاخافتنەک کر و بال کشاند سەر رۆلا مامۆستەیان یا د جڤاکێ دە.
«رۆلا مامۆستەیان د پێشڤەبرنا جڤاکێ و پەروەردەیا جوانان دە» یەک ژ مژارێن سەرەکە یێن ئاخافتنا سەرۆک بارزانی بوو.
سەرۆک بارزانی ل سەر رۆلا مامۆستەیان وها گۆت:
«مامۆستە د هەر رەوشێ دە د سەنگەرێ پێشی یێ پەروەردە و زانستێ دە بوون، وان ب دلسۆزی خزمەت ژ گەلێ کوردستانێ رە کریە و رێ نەدایە کو پێڤاژۆیا خوەندن و فێربوونێ راوەستە».
«پارا کوردستانێ بوو کۆمکوژی»
هەروها سەرۆک بارزانی ئاماژە ب وێ یەکی کر کو «ئیراق ل سەر بنگەها شریکاتیا کوردان و عەرەبان ئاڤا بوویە و پێ دە چوو:
«لێ ئەڤ شریکاتی هاتە پشتگوهکرن. پارا کوردستانێ بوو کۆمکوژی و هەولێن تونەکرنا گەلێ مە».
پشتی کو رەژیما بەرێ رووخیا دەرفەتەک دەرکەتە هۆلێ کو ژیانەکە نوو ل سەر هیمێن شریکاتی و هەڤسەنگیێ دەست پێ بکە لێ وان دیسا پشتا خوە دا دەستوورێ.
هنەک دەستهلاتدارێن ئیراقێ ب نێتا لاوازکرنا کوردستانێ و بێهێزکرنا گەلێ مە تەڤگەریان».
«پێلەک هەیە کو دخوازە ل کوردستانێ بێهێڤیتیێ ئاڤا بکە»
سەرۆک بارزانی د داویا ئاخافتنا خوە دە بال کشاند سەر وێ پێلا کو دخوازە ل کوردستانێ بێهێڤیتیێ ئاڤا بکە و گۆت:
«پێلەک هەیە کو دخوازە ل کوردستانێ بێهێڤیتیێ ئاڤا بکە، هەستا وەلاتپەروەریێ و نرخێن هەیی یێن گەلێ کوردستانێ ژ هۆلێ راکە».
سەرۆک بارزانی ژ بۆ تێکۆشینا ل دژی ڤێ پێلێ بانگی مامۆستەیان کر کو «ژ بۆ خورتکرنا هەستێن وەلاتپەروەریێ و بهەڤرەژیانێ بخەبتن».
سەرۆک بارزانی د جڤینا خوە یا ب مامۆستەیان رە بەحسا مژارێن وەکی پرۆژەیێن هەرێما کوردستانێ یێن ژ بۆ پەروەردەیێ، پەیداکرنا دەرفەتێن کار ژ جوانان رە، ئاڤاکرنا چاڤکانیێن داهاتێ و تێکۆشینا ل هەمبەری بکارئانین و فرۆتنا مادەیێن هشبر ژی کر.
ل ئالیێ دن، سەرۆک بارزانی ژ مامۆستەیان خوەست کو د ڤان مژاران دە پشتگریێ بدن حکوومەتێ و ئالیێن پێوەندیدار.
