ترکیە کوشتنا بەرپرسەکی پەکەکێ ل سلێمانیێ رادگھینە

دەزگەھا ھاوالگرییا ترکیێ (میت)ێ ل سلێمانیێ ل دژی چەکدارەکی پەکەکێ یێ ب ناڤێ بەکر کنا یێ ب ناسناڤێ “باوەر بۆتان” ئۆپەراسیۆنەکا تایبەت کر و ئەو کوشت.

ئاژانسا “ئانادۆلو” ژ سەر زارێ ژێدەرێن ئەولەھیێ راگھاند، بەکر کینا یێ کو ژ بۆ کوشتنا ئەندامێن ئارتێشا ترکیێ، ھێزێن ئەولەھیێ و میتێ دھات پەروەردەکرن، ھات کوشتن.

ل گۆر وێ ئاژانسێ، بەکر کنا د سالا 2019 دە چوویە ئیراقێ و تەڤلی پەکەکێ بوویە. ل ئیرانێ و ئیراقێ خەباتێن رێخستنی کرینە و پەکەکێ ئامەدەکاری دکر کو وی بشینە ترکیێ.

شەر و پەڤچوونێن د ناڤبەرا پەکەکێ و ترکیێ دە ل ناڤچەیێن سینۆری یێن ھەرێما کوردستانێ، باندۆرەکە مەزن ل سەر ژیانا خەلکێ کریە و نێزیکی 800 گوند و چەند دەڤەرێن گەشتیاریێ وێران و ڤالا بوونە.