وەزیرێ دەرڤە یێ ترکیێ ھاکان فیدان ئیرۆ بەربانگێ گھیشت ھەولێرێ و دێ دەربارێ چەند مژارێن گرێدایی ئەنقەرە و ھەولێرێ دە لگەل بەرپرسێن بلند یێن ھەرێما کوردستانێ دەست ب ھەڤدیتنان بکە.
وەزیرێ دەرڤە یێ ترکیێ ھاکان فیدان ئیرۆ 24ێ تیرمەھا 2023 بەربانگێ ب سەردانەکا فەرمی گھیشت ھەولێرێ و ژ ئالیێ وەزیرێ ناڤخوە رێبەر ئەحمەد، بەرپرسێ فەرمانگەھا پەیوەندیێن دەرڤە سەفین دزەیی، شێورمەندێ سەرۆکێ ھەرێمێ فەلاح مستەفا و پارێزگارێ ھەولێرێ ئۆمێد خۆشناو ڤە ھات پێشوازیکرن.
بریارە ھاکان فیدان د ھەڤدیتنێن خوە دە، چەند مژارێن گرنگ، کو د ناڤا وان دە پرسێن ئەولەکاری و ئابۆری یێن د ناڤبەرا ترکیە و ھەرێما کوردستانێ دە گۆتووبێژ بکە.
سەردانا ھاکان فیدان بۆ ھەرێما کوردستانێ و ئیراقێ، یەکەم جارە پشتی دەستبکاربوونا وی وەک وەزیرێ دەرڤە یێ ترکیێ.
رۆژنامەڤانێ ناڤدارێ ترکیێ چەتین چەتین دەربارێ سەردانا ھاکان فیدان راگهاند: “ھەر چەندە ھاکان فیدان وەک وەزیرێ دەرڤە یێ ترکیێ یەکەم جارە سەردانا ئیراقێ دکە، لێ ئەو پسپۆرێ سیاسەتا ناڤخوە یا ئیراقێ یە.”
ھەروھا گۆت: “ھەتا کو پرسگرێکا پەکەکێ بمینە، دێ پرسگرێک د پێوەندیێن ترکیێ-ئیراقێ دە بەردەوام بن.”
ئەڤ سەردانا ھاکان پشتی وێ تێ، دوھی چارشەمبێ ل بەغدایێ سەرۆککۆمارێ ئیراقێ لەتیف رەشید ل کۆشکا سەلامێ پێشوازی ل وەزیرێ دەرڤە یێ ترکیێ ھاکان فیدان و شاندا پێ رە کربوو.
د جڤینێ دە ژی ھەردو ئالیان پێوەندیێن دیرۆکی یێن ناڤبەرا ھەردو وەلاتان گۆتووبێژ کرن و تەکەزی ل سەر گرینگیا کارکرنا ژ بۆ بھێزکرن و پێشڤەبرن و بەرفرەھکرنا ئاسۆیا ھەڤکاریێ د وارێن ئابۆری، بازرگانی، ژینگەھی و مژارا ئاڤ و ئەنەرژیێ دە کرنە، ب ئاوایەکی کو خزمەتا بەرژەوەندیێن ھەڤبەش یێن گەلێن ئیراق و ترکیێ بکە.
