کۆنگرەیا ئاوارتە یا پارتیا دەمۆکراتیکا گەلان (هه‌ده‌په) ئیرۆ 27ێ تەباخێ تێ لدارخستن. نامزەتێن هەڤسەرۆکاتیێ یێن کو دێ د ڤێ کۆنگرەیێ دە ببن نامزەت دیار بوون.
ل گۆری زانیاریان، جاهیت کرکازاک و سولتان ئۆزجان نامزەتێن هەڤسەرۆکاتیا هه‌ده‌پێ نه. كۆنگره‌یا هه‌ده‌پێ ل ناڤەندا بازرگانیێ یا جیهانێ یا ل ئەنقەرەیێ وێ وه‌ره ل دار خستن و د ڤێ کۆنگرەیێ هەڤسەرۆکێن هه‌ده‌پێ دێ وەرن گوهەرتن.
هات راگهاندن کو هەڤسەرۆکێن نها میتهات سانجار و پەرڤین بولدان نابن نامزەت و ب بریارا پارتیێ، سولتان ئۆزجان و جاهیت کرکازاک دێ ببن نامزەتێن هەڤسەرۆکاتیێ.
سولتان ئۆزجان ئەنداما دەستەیا رێڤەبەرییا ناڤەندی یا هه‌ده‌پێ و جاهیت کرکازاک ژی ئەندامێ دەستەیا رێڤەبەرییا ناڤەندی یا پارتیا چەپا کەسک (YSP)ێ یە.
هات دیارکرن کو د کۆنگرەیێ دە دێ رێزکنامەیا پارتیێ ژی بگوهەرە و هەژمارا ئەندامێن مەجلیسا پارتیێ بێ کێمکرن. ل گۆری ڤێ یەکێ، هەژمارا ئەندامێن مەجلیسا پارتیێ کو نها 100 کەسە دێ داکەڤە 50 کەسی.
سولتان ئۆزجان سالا 1965ان ل ناڤچەیا دەڤەلیێ یا پارێزگەها قەیسەریێ یا ترکیێ ژ دایک بوویە. پشتی کو 12 سالان ل زانینگەها چوکورۆڤایێ کارمەندی کری یە دەڤ ژ کارێ خوە بەردایە و د سەکتۆرا تایبەت دە خەبتیە. سولتان ئۆزجانێ گەلەک سالان د سەندیکا و کۆمەلەیان دە رێڤەبەری کری یە.
جاهیت کرکازاک، سالا 1979ان ل ناڤچەیا فارقینێ یا پارێزگەها ئامەدێ یا باکورێ کوردستانێ ژ دایک بوویە. ل زانینگەها کۆجائەلیێ بەشا هقووقێ قەداندیە. کرکازاک، پارێزەرێ سەلاهاتتین دەمیرتاش و دۆزا کۆبانیێ یە. وی دەمەکێ کارمەندییا حکوومی ژی کریە.
