ئەندامێ کۆمیتەیا پەترۆل و گازێ یا پارلامەنتۆیا ئراقێ سەباح سوبحی راگهاند، ترکیێ 6 مەرج ژ بۆ دەستپێکرنا هناردەکرنا پەترۆلا کوردستانێ پێشکێش کرنە، ژ وان ژی کشاندنا گلیا دویەما حکوومەتا ئيراقێ بۆ دادگەها ناڤدەولەتی یا حاکمتیێ ل پاریسێ.
سەباح سوبحی ژ رۆژنامەیا «سەباح» رە راگهاند، شاندا ترکیێ یا ب سەرۆکاتیا وەزیرێ دەرڤە هاکان فیدان یا کو بۆ 4 رۆژان سەردانا ئیراق و هەرێما کوردستانێ کربوو، 6 مەرج ژ بۆ دوبارە دەستپێکرنا هناردەکرنا پەترۆلا هەرێما کوردستانێ و کەرکووکێ ب رێیا بەندەرا جەیهانێ رە پێشنیار کرنە.
ل گۆری ئەندامێ کۆمیتەیا پەترۆل و گازێ، شاندا ترکیێ داخوازا 13 دۆلار ل سەر هەر بەرمیلەک کریە، وەک لێچوونا ڤەگوهەستنا پەترۆلێ ب رێیا بۆریا پەترۆلێ رە.
هەروها شاندەیێ داخوازا ڤەکشاندنا گلیا دویەم یا حکوومەتا ئیراقێ بۆ دادگەها ناڤدەولەتی یا حاکمتیێ ل پاریسێ کریە، کو تێ دە داخواز ژ ئەنقەرێ دکە کو ئیراقێ ژ بۆ سالێن 2018ێ قەرەبوو بکە.
ل گۆری سه‌باح سوبحی، رایەدارێن ئەنقەرێ د هەڤدیتنێن خوە یێن ل گەل حکوومەتا فەدەرالا ئیراقێ دە، ل هەمبەر هناردەکرن پەترۆلا کوردستانێ، داخوازا مافێن دارایی یێن کۆمپانیایێن ترکیێ کرنە کو ژ بۆ هەر بەرمیلەکا پەترۆلێ 7 دۆلارە.
ل گۆری ئەندامێ کۆمیتەیا پەترۆل و گازێ، ل گەل ڤان هەر سێ مەرجان، شاندا ترکیێ 3 مەرجێن دن ژ بۆ هنارتنا پەترۆلا هەرێما کوردستانێ و کەرکووکێ ژ رایەدارێن بەغدا و هەولێرێ رە پێشنیار کرنە و دانووستاندن ل سەر وان بەردەوامن.
سه‌باح سوبحی د وێ باوەریێ دە یە کو رەوش ئەرێنی یە ژ بۆ دوبارە هناردەکرنا پەترۆلا کوردستانێ ب رێیا بەندەرا جەیهانێ، ب تایبەتی ژ بەر زەختێن ئابۆری یێن کو ل سەر حکوومەتا ترکیێ هەنە، کو رێ ددە وان لهەڤکرنێ بکن، کو ترکیە دێ سوودێ ژ مافێن دارایی یێن کو د ئەنجاما هناردەکرنا پەترۆلا کوردستانێ دە، وەربگرە.
وەزیرێ دەرڤەیێ ترکیێ هاکان فیدان رۆژا 24ێ تەباخێ ب سەرۆکاتیا شاندەکێ گهیشتبوو هەولێرێ و ل گەل سەرۆکوەزیرێ هەرێما کوردستانێ مەسروور بارزانی جڤیابوو. سەرۆکوەزیر مەسروور بارزانی ژی د کۆنفەرانسا رۆژنامەڤانی یا هەڤبەش دە راگهاند، وان ب وەزیرێ دەرڤەیێ ترکیێ و شاندا پێ رە ل سەر دەستپێکرنا هناردەکرنا پەترۆلا هەرێما کوردستانێ گۆتووبێژ کرن.
د هەمان رۆژێ دە، سەرۆکوەزیر مەسروور بارزانی د پارڤەکرنەکێ دە ل سەر تۆرا جڤاکی یا خوه (تویته‌رێ) راگهاند: «مە لگەل وەزیرێ ئەنەرژی و چاڤکانیێن سرووشتی یێ ترکیێ ئالپارسلان بایراکتار بەحسا پێویستیا دەستپێکرنا هناردەکرنا پەترۆلا هەرێما کوردستانێ ب رێیا بەندەرا جەیهانێ یا ترکیێ و نەهشتنا هەموو ئاستەنگیێن ل بەر ڤێ مژارێ کرن».
ژ 25ێ ئادارا بۆری هەتا نها هناردەکرنا پەترۆلا هەرێما کوردستانێ ب رێیا بەندەرا جەیهانێ یا ترکیێ راوەستیایە، ل گۆر رێکەفتنا ناڤبەرا هەولێر و بەغدایێ، پێویستە هەرێما کوردستانێ رۆژانە 400 هەزار بەرمیل پەترۆل رادەستی سۆمۆ بکە، ل هەمبەر ڤێ ژی، مافێن دارایی یێن هەرێما کوردستانێ ژ ئالیێ بەغدایێ ڤە وەرن دابینکرن.
چاڤكانی: كوردستان 24
