کۆنگرەیا ئاوارتە یا پارتیا دەمۆکراتیکا گەلان (هه‌ده‌پێ) ئیرۆ 27ێ تەباخێ ل ئەنقەرێ لدار دکەڤە و جاهیت کرکازاک و سولتان ئۆزجان وەک هەڤسەرۆکێن نوویێن هه‌ده‌پێ هاتن هلبژارتن.
دەنگدانا ل سەر هلبژارتنا هەڤسەرۆکێن نوو بداوی بوو و جاهید کرکازاک و سولتان ئۆزجان وەک هەڤسەرۆکێن نوو یێن هه‌ده‌پێ هاتن هلبژارتن.
سولتان ئۆزجان ئەنداما دەستەیا رێڤەبەریا ناڤەندی یا هه‌ده‌پیێ یە و جاهید کرکازاک ژی ئەندامێ دەستەیا رێڤەبەریا ناڤەندی یا پارتیا چەپا کەسک (YPS)ێ یه.
سولتان ئۆزجان سالا 1965ان ل ناڤچەیا دەڤەلیێ یا پارێزگەها قەیسەریێ یا ترکیێ ژ دایک بوویە. پشتی کو 12 سالان ل زانینگەها چوکورۆڤایێ کارمەندی کریە دەڤ ژ کارێ خوە بەردایە و د سەکتۆرا تایبەت دە خەبتیە. سولتان ئۆزجانێ گەلەک سالان د سەندیکا و کۆمەلەیان دە رێڤەبەری کریە.
جاهید کرکازاک، سالا 1979ان ل ناڤچەیا فارقینێ یا پارێزگەها ئامەدێ یا باکورێ کوردستانێ ژ دایک بوویە. ل زانینگەها کۆجائەلیێ بەشا حقووقێ قەداندیە. کرکازاک، پارێزەرێ سه‌لاحه‌ددین دەمیرتاش و دۆزا کۆبانیێ یە.
ل گۆر زانیاریان د کۆنگرەیا هه‌ده‌پێ دە، دێ رێزکنامەیا پارتیێ ژی وەرە گوهارتن و هەژمارا ئەندامێن مەجلسا پارتیێ بێ کێمکرن. ل گۆری ڤێ یەکێ، هەژمارا ئەندامێن مەجلسا پارتیێ کو نها 100 کەسە دێ داکەڤە 50 کەسی.
ڤێ جارێ بەروڤاژی کۆنگرەیێن بەرێ، پارتیا دەمۆکراتیکا گەلان (هه‌ده‌په) ل هەمبەر دۆزا گرتنێ وەک بەرگریەکێ کۆنگرەیا خوە ل دار خست، خەباتێن خوە دا راوەستاندن، هەموو پلان و پرۆژەیێن خوە ژی بۆ پارتیا چەپا کەسک ڤەگوهاستن. هەروها بریار هاتیە دایین پارتیا چەپا کەسک ژی ناڤێ خوە بگوهەرینە.
