ھێزێن سووریەیا دەمۆکراتیک (ھەسەدە) ل باژارێ حەسەکێ فەرماندارێ ئەنجوومەنا لەشکەری یا دێرازۆرێ یا سەر ب ھەسەدێ ڤە و ھەژمارەک دن ئەندامێن وێ ئەنجوومەنێ گرتن.
رەوانگەھا سووری یا مافێن مرۆڤان بەلاڤ کر، شەڤا بۆری ھەسەدێ فەرماندارێ ئەنجوومەنا لەشکەری یا دێرازۆرێ ئەحمەد ئەل خەبیل کو ب ناڤێ “ئەبوو خەولا” تێ ناسکرن ل گەل ھەژمارەک ژ ئەندامێن وێ ئەنجوومەنێ ل تاخا گوێران و دەردۆرا گرتیگەھا سیناعە یا ل حەسەکێ گرتن.
ل گۆری زانیاریێن رەوانگەھێ، ئەبوو خەولا ب ئاڤاکرنا ھێزەکا لەشکەری ل دەرڤەیی ھێزێن سووریەیا دەمۆکراتیک (ھەسەدێ) تێ تۆھمەتبارکرن کو ژ ھەزار شەرڤانان پێک تێ.
ھەڤدەم لگەل ئۆپەراسیۆنا گرتن و تەقەکرنێ، گرتیێن ل زیندانا سیناعە یا حەسەکێ سوود ژ ئالۆزیێ وەردگرن و بەرهەلستی کرن، کو ھێزێن ئەولەھیێ دو دەمژمێران ل دەردۆرا گرتیگەھێ بەلاڤ کرن، ھەتا کو ئالۆزی ب داوی بوو.
لێ ھین ژی ھێزێن ئاساییشێ کۆمەک ژ فەرماندارێن ئەنجوومەنا لەشکەری یا دێرەزۆرێ و کەسێن دن ل تاخا خشمان دۆرپێچ کرنە.
ژ ئالیێ خوە ڤە، فەرماندارێ د ئەنجوومەنا لەشکەری یا دێرەزۆرێ دە جەلال ئەل-خەبیل بانگ ل ھەڤپەیمانیا ناڤدەولەتی کر کو دەستێوەردانێ بکە، ھەروھا بانگ ل عەشیرا خوە “ئەل-عەگیدات” کر کو دەملدەست بارەگەھێن لەشکەری یێن ھەسەدێ ل دێرەزۆرێ دۆرپێچ بکن و زەختێ ل وێ بکن دا کو “ئەبوو خەولا” و گرۆپا دۆرپێچکری ل حەسەکێ ئازاد بکن.
د ھەمان دەمێ دە، ھێزێن مەزنێن لەشکەری یێن گرێدایی ھەسەدێ ژ رەقایێ بەر ب گوندەوارێن دێرازۆرێ ڤە ھاتن شاندن.
ژ ئالیێ خوە ڤە ژی، ھێزێن ئەولەھیێ یێن سەر ب ھەسەدێ ڤە قەدەغەیا دەرکەتنا دەرڤە ل گوندەوارێن دێرازۆرێ راگھاند، وەک ئامادەکاریەکێ ژ بۆ دۆرپێچکرنا گوند و باژارۆکێن کو ل دژی دەستەسەرکرنا فەرماندارێ ئەنجوومەنا لەشکەری یا دێرەزۆرێ دەردکەڤن.
ناڤەندا راگھاندنێ یا دێرازۆرێ ژی راگھاند، ھێزێن سووریەیا دەمۆکراتیک (ھەسەدە) و ھەڤپەیمانیا ناڤدەولەتی، فەرماندارێ ئەنجوومەنا لەشکەری یا دێرازۆرێ ئەبوو خەولە ژ کار دوور خست و ئەو خستنە بن چاڤدێریا ب زۆرێ.
دا زانین ژی، ھەموو پێکھاتەیێن سەر ب ئەنجوومەنێ ڤە دکارن کار و ئەرکێن خوە ب ئاوایەکی نۆرمال بقەدینن و ل گۆری رێنمایێن سەرکردایەتیا نوو، چ کەس راستی دەستدرێژیێ نایێ.
دیار کر ژی، د دەمەک نێزیک دە ھەڤپەیمانا ناڤدەولەتی و ھەسەدە دێ لگەل شێخێن عەشیرێن دێرەزۆرێ و رووسپیێن وان بجڤن ژ بۆ رێڤەبەریا لەشکەری یا نوو دەستنیشان بکن.
