ئالیگرێن حەشدا شەعبی و عەسائیب ئەھلی حەق ل دژی رادەستکرنا ئەنجوومەنا سەرکرداتیا پارتیا دەمۆکراتا کوردستانێ (پەدەکێ) ل کەرکووکێ، رێیا کەرکووک-ھەولێرێ گرتن.
ل گۆر ئاگاهیان، ئالیگرێن حەشدا شەعبی و عەسایب ئەھلی حەق ل دژی بریارا سەرۆکوەزیرێ ئیراقێ محەمەد شیاع سوودانی یا رادەستکرنا ئەنجوومەنا سەرکرداتیا پەدەکێ ل کەرکووکێ دەرکەتن و رێیا کەرکووک – ھەولێرێ گرتن و ئاستەنگی ژ بۆی شۆفێران چێکرن.
بارەگەھا پەدەکێ، پشتی بوویەرێن 16 جۆتمەھا 2017، بوویە فەرمانداریا ئۆپەراسیۆنێن کەرکووکێ.
ژ ئالیێ دن ڤە ژێدەرەکی ژ رێڤەبەریا گشتی یا پەروەردەیێ یا کەرکووکێ ژی راگھاند، ئیرۆ دانێ سبێ ھندەک ئالیگرێن حەشدا شەعبی و عەسائیب ئەھلی حەق رێیا سەرەکەیا د ناڤبەرا ھەولێر و کەرکووکێ دە گرتن و ب دەھان خوەندەکار نەکارین خوە بگھینن ئەزموونێن خوە و ژێ بێپار مان.
رێڤەبەرێ پەروەردەیا کەرکووکێ راگەھاند، ئەو ھەول ددن نامەیەکێ ژ بۆ رێڤەبەریا گشتی یا پەروەردەیێ بشینن، دا کو چارەسەریەکێ ژ بۆ خوەندەکارێن کو ژ بەر خوەپێشاندانێن ئالیگرێن حەشدا شەعبی نەکارین ئەزموونێن خوە بکن، ببینن.
د دەستپێکا ڤێ مەھێ دە، سەرۆکوەزیرێ ئیراقێ و فەرماندارێ گشتی یێ ھێزێن چەکدارێن ئیراقێ محەمەد شیاع سوودانی فەرمانا ڤەگەراندنا بارەگەھێن پارتیا دەمۆکراتا کوردستانێ (پەدەکێ)یێن داگیرکری ل کەرکووکێ دابوو.
33 بارەگەھێن پەدەکێ ل کەرکووکێ ھەنە و پرانییا وان ھاتنە ڤالاکرن، لێ بارەگەھا سەرەکەیا ئەنجوومەنا سەرکرداتیا پەدەکێ ل کەرکووکێ، ھەتا نھا ژ ئالیێ فەرمانداریا ئۆپەراسیۆنێن کەرکووکێ ڤە داگیرکرییە.
د 16 جۆتمەھا 2017 دە، یەنەکێ ب رێکەفتنا لگەل حەشدا شەعبی کەرکووک رادەست کر و ژ وێ دەمێ ڤە، پارتیا دەمۆکراتا کوردستانێ (پەدەکێ) ھەموو بارەگەھێن خوەیێن ل وی باژاری ڤالا کرن و وەکە باژارەکی داگیرکری ب ناڤ کر. نھا پشتی ئاڤاکرنا حکوومەتا سوودانێ و لھەڤکرنا ل سەر رێڤەبەریا دەولەتێ، پەدەکە دخوازە ڤەگەرە کەرکووکێ.
