ژ بەر رەوشا ئابۆری و خزمەتگوزاری یا خراب ل رۆژئاڤایێ کوردستانێ، پێلا کۆچبەریێ ژ ناڤچەیێن د بن کۆنترۆلا رێڤەبەریا پەیەدێ دە بۆ وەلاتێن دەردۆرێ و جیھانێ زێدە بوویە.
ل گۆر ئاگاهیان، رۆژانە ب دەھان جوان ژ باژارێ کۆبانێ ب رێیا گوندێن سینۆری بەر ب تورکیێ رە کۆچبەر دبن.
ژێدەر ئاماژە ب وێ چەندێ دکن کو قاچاغی ب ھەماھەنگی د ناڤبەرا قاچاغچیان و رێڤەبەریا پەیەدێ دە ب رێ ڤە دچە، و کوژمێ 1500 دۆلارێن ئەمەریکی ژ ھەر کەسەکی کو سینۆر ب قاچاغی دەرباس دکە، وەردگرن.
هەر وەها ژێدەر دیار دکن، ژ بەر کریارێن رێڤەبەریا پەیەدێ ژ رەڤاندنا زارۆکان و لەشکەریا نەچار و نەبوونا دەرفەتێن کار و رەوشا خزمەتگوزاریێ یا خراب، خەلکێ باژێر، بەرێ خوە ددە وەلاتێن بیانی و رێژەیا ھەری مەزن ژ کۆچبەران نفشێ جوانانە.
ژێدەران دیار کر ژی، بۆ پەیداکرنا تێچوونا کۆچبەریێ، وەلاتی نەچار دبن مال و ملکێن خوە ب نرخێن ھەرزان ل باژێر بفرۆشن.
ل باژارێ کۆبانێ کۆچبەری گھشتیە ئاستا ھەری بلند، و ب دەھان وەلاتیێن باژارێ کۆبانێ ل سەر رێیا کۆچبەریێ بۆ وەلاتێن بیانی و پێشەرۆژەکا ئارام ل ناڤ دەریا و دارستانان جانێ خوە ژ دەست دانە، و ب دەھان کەس تا نھا چارەنڤیسا وان نە دیارە.
ل گۆری چاڤدێران، ئارمانجا رێڤەبەریا پەیەدێ ژ ڤان کریاران ڤالاکرنا رۆژئاڤایێ کوردستانێ و دروستکرنا گوھەرتنا دەمۆگرافی یە.
