تەڤگەرا دەمۆکراتیکا کوردستانێ «ته‌ده‌که-تەڤگەر» و پارتییا ئازادییا کوردستانێ «پاک» دەربارێ رەوشا ل کەرکووکێ د پەیامەکە هەڤبەش دە راگهاندن، «ڤان ئێریشان ژی جارەکە دن ئیسپات کرییە هەتا کو هێزێن پێشمەرگە ل کەرکووکێ بجیهـ نەبن و ئاساییشا کەرکووکێ نەکەڤە بن دەستهلاتدارییا رێڤەبرییا هەرێما کوردستانێ، ژیانا کوردێن کەرکووکێ و ئەولەهییا مال و ملکێن وان مسۆگەر نابن».
پشتی کو ئالیگرێن حه‌شدا شەعبی ل دژی رادەستکرنا بارەگەهێن پارتیا دەمۆکراتا کوردستانێ (په‌ده‌كه) ژ رۆژا 28\08\2023ان ڤە رێیا کەرکووک – هەولێرێ گرتنە، وەلاتیێن کوردێن کەرکووکێ دوهی شەمیێ 2ێ ئیلۆنێ نەرازیبوونا خوە د خوەپێشاندانەکێ دە نیشان ددن و داخوازا ڤەکرنا رێ کرن.
د بن فشارا خوەپێشاندەرێن کورد دە، شەڤا بۆری د خوەپێشاندانان دە ژی کەسێن کو رێیا کەرکووک – هەولێرێ گرتنە، چادرێن خوە راکرن و جهێن خوە ڤالا کرن و ب ڤی ئاوایی ژی رێیا کەرکووک – هەولێرێ هات ڤەکرن. ل گۆر زانیاریێن پەیامنێرێ ک24ێ د ئەنجاما خوەپێشاندانان دە، 4 کەس شەهید بوونە و 12 کەس بریندار بوونە و رەوشا هەژمارەک برینداران گرانە.
پەیاما ته‌ده‌كه-تەڤگەر و پاکێ وهایه:
ل پارێزگەها کەرکووکێ یا باشوورێ کوردستانێ ب ئاوایەکی پلانکری ژ ئالییێ هنەک ئالییێن عەرەب و ترکمەنێن کرێگرتی، ڤەکرنا بارەگەها پارتیا دەمۆکراتا کوردستانێ (په‌ده‌كێ) یا ل کەرکووکێ تێ ئاستەنگکرن و رێیا د ناڤبەرا هەولێر و کەرکووکێ گرتنە و ناهێلن خەلک ژییانا خوە یا ئاسایی و چوونووهاتنێ بدۆمینن.
کوردێن کەرکووکێ ل دژی گرتنا رێیێن باژێر خوەپێشاندانەک ل دار خستنە.
د خوەپێشاندانێن کوردان دە، ب ئێریشا چەکدارێن ب سەر بەغدایێ ڤە، 4 خۆرتێن کورد هاتنە کوشتن و 20 کەس ژی بریندار بوون.
ئەو ئالییێن دژمنێن مللەتێ کورد، ب داگیرکرنا کەرکووکێ تەنێ قایل نابن، دخوازن کوردان ژ کەرکووکێ دەرخینن، رێ ل بەر خەباتێن وان یێن سیاسی بگرن.
جهێ بالێ یە کو، پشتی سەرەدانا بەغدایێ یێ وەزیرێ دەرڤەیێ ترکیێ ئەڤ پرۆڤۆکاسیۆن و ئێریشێن کرێگرتیێن ترکمەن و عەرەبان دەستپێ کرییە.
لێ، د رەفەراندووما سەرخوەبوونێ یا 25ێ ئیلۆنا 2017ێ دا ژی جارەکە دن ئیسپات بوو کو، کەرکووک کوردستانە و تو هێزێن داگیرکەر و کرێگرتیێن وان دێ نکاربن ڤێ ناسنامەیا کەرکووکێ ژ هۆلێ راکن.
ڤان ئێریشان ژی جارەکە دن ئیسپات کرییە هەتا کو هێزێن پێشمەرگە ل کەرکووکێ بجیهـ نەبن و ئاسایشا کەرکووکێ نەکەڤە بن دەستهلاتدارییا رێڤەبرییا هەرێما کوردستانێ، ژیانا کوردێن کەرکووکێ و ئەولەهییا مال و ملکێن وان مسۆگەر نابن.
دڤێ دەملدەست مادەیا 140ی یا قانوونا بنگەهینا ئیراقا فەدەرال بێ بجیهـ ئانین. ئەم باوەر دکن کو کەرکووک ب ئیرادەیا هەموو گەلێ کەرکووکێ دێ پشتراست ڤەگەرە سەر هەرێما کوردستانێ.
دڤێ هەموو گەلێ مە یێ باشوورێ کوردستانێ و پارتیێن سیاسی، دەزگەهێن سڤیل، پارلامەنتۆ، حکوومەت، سەرۆکاتی و هێزێن پێشمەرگەیێن هەرێما کوردستانێ ب یەک دەنگی و یەک هەلوەستی ل دژی ڤان ئێریش و پرۆڤۆکاسیۆنێن قرێژ دەرکەڤن. دڤێ ل همبەری حکوومەتا به‌غدایێ هەلوست و سەکنەکە جدی و یەکگرتی نیشان بدن.
ژ بۆ رێ ل بەر گرتنا ئێریشێن ب رەنگی دڤێ حکوومەتا بەغدایێ بەرپرسیاریێن خوە بجیهـ بینە. هەروەها دڤێ نەتەوێن یەکبوویی ب ئاوایەکی ئەنجامگر ل دژی حکوومەتا بەغدایێ هەلوەستەکە جدی بگرە.
ئەم ل گەل خوشک و برایێن خوە یێن کوردێن کەرکووکێ نە.
ئەم داگیرکەرێن کەرکووکێ و هەموو هەڤالبەند و پێگرتی و کرێگرتیێن وان شەرمەزار دکن.
ئەم سەرساخییێ ژ مالباتێن شەهیدان و ژ گەلێ مە را، شیفایا خێرێ ژ برینداران را دخوازن.
ته‌ده‌كه – تەڤگەر «تەڤگەرا دەمۆکراتیکا کوردستانێ»
پاک «پارتییا ئازادییا کوردستانێ»
