ھێزێن ئەولەھیێ یێن کو ل تاخێن کوردان یێن کەرکووکێ ھاتنە بجھکرن، ئاستەنگیێ ژ بۆ چوون و ھاتنا وەلاتیان چێدکن و ژ بۆ لێگەرین و گرتنا جوانێن کوردێن بەشداری خوەپێشاندانێ بوونە دەست ب ئۆپەراسیۆنەکا گرتنێ کرنە.
ل گۆر ئاگاهیان، پشتی ئالۆزیێن شەڤا بۆری د ناڤبەرا ھێزێن ئەولەھیێ و خوەپێشاندەرێن کورد دە، ھەژمارەکە مەزن یا ھێزێن ئەولەھیێ یێن ژ دژە-تەرۆر، ئارتێشا ئیراقێ و گرۆپێن حەشدا شەعبی پێک تێن، ل تاخێن کوردان بجھ بوونە.
ئاگاهی ددن خویاکرن، ھەموو کۆلان و تاخێن کوردستانی یێن کەرکووکێ ب تایبەت تاخێن شۆرەش، سەرچنار و رەحیم ئاوا ژ ئالیێ ھێزێن ئەولەھی و لەشکەری ڤە ھاتنە داگیرکرن و ژ بۆ چوون و ھاتنا وەلاتیان ئاستەنگیان چێدکن.
هەر وەها ھێزێن ئەولەھیێ یێن ئیراقێ ل ناڤا تاخێن کوردان یێن باژارێ کەرکووکێ دەست ب ئۆپەراسیۆنەکا لێگەرین و گرتنا وان خۆرتێن کوردێن کو شەڤا بۆری بەشداری خوەپێشاندانێ بووبوون کرنە و چەند جوان ژی گرتنە.
پشتی کو ئالیگرێن حەشدا شەعبی ل دژی رادەستکرنا بارەگەھێن پارتیا دەمۆکراتا کوردستانێ (پەدەکێ) ژ رۆژا 28/8/2023 ڤە رێیا کەرکووک-ھەولێرێ گرتنە، وەلاتیێن کوردێن کەرکووکێ دوھ شەمبیێ 2 ئیلۆنێ نەرازیبوونا خوە د خوەپێشاندانەکێ دە نیشان ددان و داخوازا ڤەکرنا رێ کرن.
پشتی خوەپێشاندانا وەلاتیێن کوردێن ل کەرکووکێ ژ بۆ ڤەکرنا رێیا سەرەکەیا د ناڤبەرا کەرکووک و ھەولێرێ دە، کەسێن کو ژ بۆ گرتنا رێ کۆن ڤەدابوون، جھێ خوە ڤالا کرن و رێ د بن زەختێن خوەپێشاندەرێن کوردێن ل کەرکووکێ دە ھاتە ڤەکرن.
د خوەپێشاندانا کەرکووکێ دە ژی، د ئەنجاما گولەبارانا ھێزێن ئەولەھیێ دە، دوھی 4 کەس شەھید بوون و 14 کەس ژی بریندار بوون. ھەروھا ب دەھان گەنج ھاتن بنچاڤکرن. تەڤی راکرنا قەدەغەیا چوون و ھاتنێ، ھەژمارەکا مەزن یا ھێزێن ئەولەکاریێ ل تاخێن کوردان بجیھ بوونە.
پشتی پەیامێن سەرۆک بارزانی، سەرۆکێ ھەرێمێ و سەرۆکوەزیرێ ھەرێما کوردستانێ، سەرۆکوەزیرێ ئیراقێ و فەرماندەیێ گشتی یێ ھێزێن چەکدارێن ئیراقێ محەمەد شیاع سوودانی شەڤا بۆری بریار دا کو کۆمیتەیەک ژ بۆ لێکۆلینکرنا سەدەمێن شەھیدبوون و برینداربوونا وەلاتیێن کەرکووکێ بێ ئاڤاکرن.
