ھێزێن سووریەیا دەمۆکراتیک (ھەسەدە) جڤینا لگەل جیگرێ وەزیرێ دەرڤەیێ ئامەریکایێ، فەرماندارێ ئۆپەراسیۆنا “عەزم ئەل سەلب” یا ھەڤپەیمانیا ناڤدەولەتی و عەشیرێن دێرازۆرێ ب ئەرێنی بناڤ دکە و دبێژە، “ھەسەدە و عەشیرێن ھەرێمێ ھەڤنێرینن.”
بالیۆزخانەیا ئامەریکایێ ل شامێ دوھی 3 ئیلۆنێ ل سەر رووپەلا خوەیا “فەیسبۆکێ” راگھاند، جیگرێ ئالیکارێ وەزیرێ دەرڤەیێ ئامەریکا ئیسان. گۆلدرچ و فەرماندارێ ئۆپەراسیۆنا “عەزم ئەل سەلب” یا ھەڤپەیمانیا ناڤدەولەتی یا ل دژی داعشێ گەنەرال جۆیل ب. ڤۆل دەربارێ رەوش و ئالۆزیێن ل دێرازۆرێ دە لگەل ھەسەدێ، مەسەدێ و سەرۆکێن عەشیرێن دێرازۆرێ جڤیان.
ناڤەندا راگھاندنێ یا ھەسەدێ داخویانیەک دەربارێ جڤینێ دە بەلاڤ کر و تێ دە راگھاند، “جڤین ب ئارمانجا نیقاشکرنا رەوشا دێرازۆرێ و دەستێوەردانێن دەرڤە تێ دە ل دار کەت، ھەسەدێ و عەشیرێن ھەرێمێ ھەڤنێرین بوون و د جڤینێن بەرێ دە ژی ل سەر خورتکرنا ئەولەھی و ئارامیا ھەرێمێ لھەڤ کرنە.”
دیار کر ژی، ل سەر رەوشا مەیدانی ھێزێن ھەسەدێ خەباتێن لێگەرینێ ل باژارۆکێ بسێرایێ و بەشەکا مەزنا ئەل شھێل ب داوی کرن و بەر ب داویکرنا ڤان خەباتان ل باژارۆکێ زیبان ڤە دچن.
ھەسەدێ دا زانین، کەسێ ب ناڤێ ئیبراھیم ئەل ھەفەل، سەرۆکێ فتنەیێ یە و ئێدی ژ ئالیێ ھێزێن وان ڤە تێ خوەستن، ژ بەر کو ئەو بوو سەدەما رژاندنا خوینا شەرڤانان و خەلکێ و کۆچبەرکرنا وان، ھەروھا ئەو سەدەما وێرانکرنا سازیێن خزمەتگوزاریێ و ل گۆری فەرمانێن ئالیێن دەرڤە سەرکێشیا ھەولدانێن دەرخستنا فتنەیێ دکە.
تەکەزی ل سەر وێ یەکێ ژی کر. ب بالداریا خەلکێ دێرازۆرێ و رووسپیێن وێ ئەڤ پلانا وان تێک چوو و ئەو ئیبراھیم ئەل ھەفەل و چەکدارێن ژ رۆژئاڤایێ فراتێ ئانینە، عەفوو ناکن.
