ئەندامێ کۆمیتەیا رێڤەبەرا پەکەکێ دووران کالکان د بەرنامەیەکا تایبەتا مەدیا خەبەر یا گرێدایێ پەکەکێ دە ئاخڤی و جاردن ئێریشێ پەدەکێ کر. ھەر دەما کو پەکەکە خوە ژ شەرەکی رە ئامادە دکە ل گۆرا خوە زەمینێ ڤێ یەکێ ب پرۆپاگاندە و دەرەوان ئامادە دکە.
کالکان د ئاخڤتنا خوە دە دبێژە: ژ نھا و پێ ڤە ل مەتینا، گارێ، خنێرە؛ ل کو دەرێ ئەو گاڤەکێ باڤێژن و گولـلەیەکێ بتەقینن و ب پێش ڤە وەرن، دێ ئێدی ئەڤ تشتە ببە شەر. دڤێت ھەر کەس ڤی تشتی بزانبە.
د بەردەوامیا ئاخڤتنا خوە دە کالکان پەدەکێ ب خیانەتێ و ھەڤالبەندیا دژمنا تومەتبار دکە. لێ چ جاران سیخووریا ئەو ب خوە دکن نابینن. تایبەتی پشتی بوویەرێن کەرکووکێ ئەڤ داخوویانیا پەکەکێ بالکێشە. دخوەیە جاردن خوەدیێن وان ژ بۆ پەدەکێ تەھدید بکن کارتا پەکەکێ تێخن رۆژەڤێ.
یا ھەری بالکێش ئەوە کو کالکان دبێژە، پەدەکێ ل خنێرە، مەتینا، گارێ و ھندەک دەڤەرێن دن یێن باشوورێ کوردستانێ گاڤەکی باڤێژە ئەڤ ژ بۆ پەکەکێ دبە سەدەما شەر. لێ گەرەک بێ پرسین ، گەلۆ چ کارێ وە ل ڤان دەڤەران ھەیە؟ ئەڤ دەڤەر ل باشوورێ کوردستانێ نە و وەک ھەر پارتیەک باشوورێ کوردستانێ مافێ پەدەکێ یە ل ڤان دەڤەران تەڤبگەرە. یا ژ ھەمییێ گرینگتر ، ئەرکا حکوومەتا ھەرێما کوردستانێ یە ڤان دەڤەران بپارێزە و ئارامیەکی ل ڤان دەڤەران پێکبینە. تەرۆرا کو ئەڤە ب سالانە پەکەکە ل ڤێ ھەرێمێ دکە بوویە سەدەم کو ب دەھان ھەزار ھەموەلاتییان تەرکا جھ و وارێن خوە کرنە.
ژ ئالیەک دن ڤە پەکەکە گەلەک ب زانەبوون دەولەتا ترک کشاندیە ھەمان دەڤەرێ و کریە قادا شەر.
ئارمانج و سیاسەتا پەکەکێ یا دژاتیا دەستکەفتیێن کوردستانێ ڤەکریە. لێ یا بالکێش ئەوە کو، ئەڤ یەک مخابن ژ ئالیێ پرانیا پارتیێن سیاسی ڤە نایێ دیتن. ھەتا ئالیێن ڤێ یەکێ دزانن ژی بێ دەنگن و ڤێ بێدەنگیێ دبن ئالیکارێ سیاسەتا پەکەکێ یا ل دژێ دەستکەفتیێن کوردستانێ.
