تۆپخانەیێن ئارتێشا ترکیێ گوندەکی رۆژئاڤایێ منبجێ کر ئارمانج و د ئەنجامێ دە 3 زارۆک ب گرانی بریندار بوون.
رەوانگەها سووری یا مافێن مرۆڤان (سۆهر) بەلاڤ کر، دوهی د ئەنجاما تۆپبارانا ئارتێشا ترکیێ ل سەر گوندێ تەهنە یێ دکەڤە رۆژئاڤایێ منبجێ دە، 3 زارۆک ژ مالباتەکێ ب گرانی بریندار بوون و ژ بۆ نەخوەشخانەیا بەرکالا ل باژارێ منبجێ هاتن ڤەگوهاستن.
د ڤان چەند رۆژێن داوین دە، ل گەلەک ئەنیێن رۆژهلات و رۆژئاڤایێ منبجێ یێن د ناڤبەرا ئەنجوومەنا لەشکەری یا منبجێ و گرووپێن چەکدارێن سەر ب ئارتێشا ترکیێ دە، شەر و پەڤچوون دەردکەڤن.
رەوانگەها سووری یا مافێن مرۆڤان دیار کر، دوهی دانێ سبێ گرووپێن چەکدار ئێریشی گوندێ ئەل-بوگاز ل رۆژئاڤایێ منبجێ کر و پشتی پەڤچوونێن دژوار، ئەنجوومەنا لەشکەری یا منبجێ ئەو ئێریشی شکاند.
هێزێن ئەنجوومەنا لەشکەری یا منبجێ دو ئۆتۆمبیلێن کۆمێن ئێریشکار ئارمانج کرن و د ئەنجاما تەقاندنا وان دە، 8 چەکدار هاتن کوشتن، 13 چەکدار بریندار بوون و 3 بریندار وەک دیل هاتن گرتن.
هەروه‌ها هێزێن ئەنجوومەنا لەشکەری یا منبجێ ل گوندێ عەرەب حەسەنێ ل رۆژهلاتێ منبجێ درۆنەکە ئارتێشا ترکیێ خست خوارێ.
