ل دیاربەکرێ کۆنگرەیا یەکتیا پارتیا ئازادیا کوردستانێ (پاک) و تەڤگەرا دەمۆکراتیکا کوردستانێ (تەڤگەر) برێڤە دچە. پاک و تەڤگەر دخوازن ب ناڤ و بەرنامەیەکا نوو ل باکورێ کوردستانێ سیاسەتا کورد یا نەتەوەیی بەرفرەھتر بکن و ژ بۆ بدەستانینا مافێن کوردان یێن نەتەوەیی چالاکتر خەباتێن سیاسی برێڤە ببن.
ل دیاربەکرێ پشتی ھەڤدیتن و گۆتوبێژێن سال و نیڤێ پارتیا ئازادیا کوردستانێ (پاک) و تەڤگەرا دەمۆکراتیکا کوردستانێ (تەدەکە- تەڤگەر) بریارا یەکتیێ راگھاندن. کۆنگرە دێ دو رۆژا بەردەوام بکە. ژ چار ئالیێن کوردستانێ نوونەر و رێڤەبەرێن گەلەک پارتی و رێخسستنان و وەلاتی بەشداری کۆنگرەیە بوون. دیوارێن سالۆنا کۆنگرەیێ ب وێنە و نڤیسێن سەرۆک و رێبەرێن کوردان و نڤیسێن لێ خوەدی دەرکەتنا رەمزێن کوردستانی ھاتن خەملاندن. سیاسەتمەدارێن پاکێ دان زانین کو؛ ئەو ل باکورێ کوردستانێ ژ بۆ کوردان داخوازا ستاتویێ دکن و دبێژن؛ لێ خوەدی دەرکەتنا ستاتویا ھەرێما کوردستانی ژی ئەرکێ ھەموو کوردانە.
سەرۆکێ گشتی یێ پاکێ موستافا ئۆزچەلیک ژی گۆت: “پارتیا مەیا نوو ل سەر دو ئەساسان تێ ئاڤاکرن؛ یەک خورتکرن و بەرفرەھترکرنا پارتیێ یە یا دن ژی سازکرنا ھەڤپەیمانا مللی و دەمۆکراتیکە. ئەم دخوازن وان ئالیێن مللی و نەتەوەیی و دەمۆکراتیک ھەموویان بکن بینن جەم ھەڤ. ئەم داخوازا مافێن مللەتێ کورد دکن. داخوازێن لەزگین، قەبوولکرنا مللەتێ کورد، ناسنامە و زمانێ کوردی نە. ئەڤ داخوازێن ھەڤبەشیێن مە ب ملیۆنان کوردانە. ئەم دخوازین کوردان ل سەر وان داخوازێن ب لەز بینن جەم ھەڤ و ببن بەرەیەک.”
د کۆنگرەیێ دە گەلەک سیاسەتمەدار و رەوشەنبیران ژی گۆتار پێشکێش کرن و گۆتن کو؛ د سیاسەتا کوردی یا ل باکورێ کوردستانێ دە ڤالاھیەک ھەیە و دڤێی ئەڤ ڤالاھی ب پارتیەکە نەتەوەیی، دەمۆکراتیک و گرسەیی بێ داگرتن و ب رێ و رێبازێن دەمۆکراتیک ل مافێن چارەنووسا کوردان بگەرە. سیاسەتمەدارێن تەدەکە-تەڤگەرێ تینن زمێن، دا کو ل باکورێ کوردستانێ باشتر تەمسیلا رەوتێ نەتەوەیی یا کورد بێ کرن ڤێ پێنگاڤێ دهاڤێژن.
پەیڤدارێ تەدەکە-تەڤگەر جانۆ ئامەدی دبێژە: “ئەم دزانین ئیرۆ ل باکورێ کوردستانێ دو خەتێن ئەساسی ھەنە؛ یەک بەر ب ترکیەیێ ڤە دچە، دەمۆکراتیکبوونا ترکیێ و ترکیەییبوویینێ ئەساس دگرە. خەتا دن ژی یا کوردستانی یە. ئەم دبێژن؛ ئەم کوردن، وەلاتێ مە کوردستانە. مافێ مە ھەیە کو ئەم ل سەر ئاخا خوە دەستھلاتدار بن. ھەگەر شریکاتیەک ھەبە دڤێت ب ڤینا گەلێ کورد بە نە ب دارێ زۆرێ بە. ژ بۆ ڤێ یەکێ ئەم داخوازا مافێن نەتەوەیی یێن کوردان دکن.”
پشتی ڤێ کۆنگرەیێ، دێ 17 ئیلۆنێ ل ئەنقەرەیێ کۆنگرەیا پاکێ برێڤە بچە و دێ دەربارێ یەکتیا پاک و تەدەکە-تەڤگەرێ دە بریارێن نوو بێنە راگھاندن.
