د 9 ئیلۆنێ دە بافل تالەبانی و شاندا پێ رە چووبوون تەھرانێ و ب رایەدارێن ئیرانێ رە ھەڤدیتن کربوون. دوھ بافل تالەبانی ب سەرۆکێ پارلامەنتۆیا ئیرانێ محەمەد باقر قالیباف رە ھەڤدیتن کربوو.
سەردانا بافل تالەبانی یا ئیرانێ پشتی داخوازا ئیرانێ یا ژ بۆ بێچەککرنا ئالیێن سیاسی یێن رۆژھلاتێ کوردستانێ ل ھەرێما کوردستانێ، راستی ئەلەقەیەکە مەزن ھات.
ھەتا 19 ئیلۆنێ دەم ژ بۆ جیبجیکرنا رێکەفتنا ئەولەھیێ یا د ناڤبەرا تەھران و بەغدایێ دە هاتیە ئیمزەکرن ب ئیراق و ھەرێما کوردستانێ ھاتیە دایین، د ڤێ رێکەفتنێ دە هاتیە گۆتن کو دڤێت چەک ژ پارتیێن رۆژھلات بێ ستەندن و ئەو د کامپەکە سڤیل دە ل ئیراقێ بێن نیشتەجیکرن. سەردانا بافل تالەبانی یا ب ڤی رەنگی چەند رۆژان بەریا بداویبوونا ڤی دەمی بوو سەدەما فکاران. ب تایبەتی پارتیێن رۆژھلاتێ کوردستانێ دترسن کو بافل تالەبانی ب ئیرانێ رە ل سەر وان پەیمانەک چێکربە.
د سالا 1996 دە چ قەومی؟
د سالا 1996 دە د ناڤبەرا ئیران و یەنەکێ دە ل دژی پارتیێن رۆژھلاتێ کوردستانێ پەیمانەکا پیلانگێری ھاتە چێکرن. ل گۆری پەیمانێ ل ھەرێما کو پارتیێن کورد تێ دە بوون، ئانکو ل باژارۆکێ کۆیە یێ باشوورێ کوردستانێ کو 250 کم دووری سینۆرێ ئیرانێ بوون، ئۆپەراسیۆن ھات کرن و تەسلیمبوون ھات فەرزکرن.
ھێزێن ئیرانێ د 26 تیرمەھێ دە ب گەلەک ترومبێل و چەکێن گران ژ دەریێ سینۆری یێ باشماخێ یێ د بن کۆنترۆلا یەنەکێ دە دەرباس بوون. د سەر پێنجوینێ رە خوە گھاندن ھەرێما ھەیبەت سولتان. ل گەل وان کۆمەک پێشمەرگەیێن یەنەکێ ژی ھەبوون.
دەما کو نێزی ناڤەندا گشتی یا دەمۆکراتێ یا ب ناڤێ کەلھا دەمۆکرات بوون، ب چەکێن گران دەست ب لێدانا وان کرن. ب دەھان سڤیل و پێشمەرگەیێن دیمۆکراتێ ژیانا خوە ژ دەست دان. یەنەکێ ھێزێن ناڤنەتەوەیی راوەستاندن و گۆت کو ئێریش ژ ئالیێ سەددام ڤە ھاتیە کرن. ژ ئالیێ دن ڤە نوونەرێ یەنەکێ فوئاد مەعسووم چوو جەم پارتیێن رۆژھلاتێ کوردستانێ و داخواز ژ وان کر کو ب ئیرانێ رە رێکەفتنەکێ ئیمزە بکن.
ژ بەر ڤێ خیانەتا کو یەنەکێ ل پارتی، وەلاتپارێز و گەلێ رۆژھلاتێ کوردستانێ کریە، کوردێن رۆژھلات ھەتا نھا ژی ل ھەمبەر یەنەکێ ب ھێرسن و بەرتەکان نیشان ددن.
کەسایەتیا ب گومانا بافل تالابانی
داخویانیا کو چوونا بافل تالەبانی بۆ ئیرانێ ب ئاگاھیا حکوومەتا ئیراقێ بوویە، گومانێن ھەیی زێدەتر کرن. کەسایەتیا بافل تالابانی ژی ژ کرنا ھەر تشتی رە ڤەکری خویا دکە. گەل د وێ باوەریێ دەیە کو سەردانا بافل بۆ ئیرانێ، د دەمەکێ دە کو ئیران ئێریشێن خوە ل دژی کوردستانێ زێدە دکە، دێ خزمەتا بەرژەوەندیێن ئیرانێ بکە نە بەرژەوەندیێن کوردان. یەنەکە پشتی خیانەتا کەرکووکێ یا سالا 2017 ب خەباتێن خوەیێن ئالیگریا ئیران و شیعەیێن بەغدایێ تێ ناسکرن.
